Gawa bebendar agi awak RTM terus dipechaya

KUCHING: Radio Televisyen Malaysia (RTM) dipinta bebendar gawa nyadi raban broadcasting ke dipechaya.

Ku Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah, sekumbang 76 taun penumbuh RTM, bemacham pemar enggau penguji ti ditapi.

“Pemansang teknologi nya entara pemar ditapi laban RTM mesti besemekih ukai semina ngagai raban broadcasting ari sektor peribit tang mega media online sereta sida ti ngaga portal, video, berita enggau ke bukai.

“Dikena mutarka pemar nya, RTM mesti besemekih lebuh mantaika isi berita, radio enggau program TV nguna teknologi pemadu baru nentuka RTM terus diterima,” ku iya nerang.

Karim mansutka jaku nya ba Pengerami Ngintu Taun Ke-76 RTM ti diatur di Auditorium RTM Kuching, kemari.

Ku iya, pemanah sereta pengamat berita enggau program ti dibantaika RTM nya identiti sida lalu pedis ditunda.

“Pekara tu mesti dijaga enggau dikemanah nentuka RTM majak angkat nyadi pelasar ke ulih dipechaya.

“Ari pengawa tu, sida ulih ngangkatka nama RTM nyadi sebuah organisasyen ke ngenataika tiap isu enggau agenda pemansang perintah ngagai komuniti,” ku iya nerang baru.

Karim mega madahka RTM seruran bekerejasama enggau komuniti sekalika ba mengeri tauka menua pesisir.

Ambika banding ku iya, baka pengerami makai taun ke-17 tu, bemacham aktiviti udah diatur stesyen radio di RTM pengelama 76 jam enda ngetu, Demonstrasyen Nyelamat Opis Penyaga Menua Malaysia (APM) Sarawak enggau ke bukai.

“Aktiviti nya dikearap ulih narak semangat RTM lebih agi RTM Sarawak napi bemacham pemar ngambi nyadi pelasar pemadu manah enggau tulin,” ku iya nerang baru.

Ba pengawa nya, Karim udah ngemata Direktor APM nyuaka surat Raban Penyangga Penusah Mensia Mayuh (CDERT) ngagai Direktor Broadcasting Sarawak, Nasrul Hakim Md Noh enggau mega bejadika pengawa ngelancharka segmen Kuppa Kopi TV.

BEJADI..Menteri Dagang Temuai, Seni Kreatif, Industri Pemerindang Datuk Seri Abdul Karim Rahman Hamzah (enam kiba) sereta Direktor RTM Sarawak Nasrul Hakim Md Noh nyirap kek kelai bejadika Pengerami Ngintu Taun RTM Ke-76th ba Auditorium RTM, Kuching. Gambar: Mohd Alif Noni

Suara Sarawak