SIBU: Gempung Parti Sarawak (GPS) andal ulih menang semua penuduk Parlimen di nengeri tu dalam Pengawa Bepilih Besai Ke-15 (PRU-15) ti deka datai.

Premier Sarawak Datuk Patinggi Tan Sri Abang Johari Tun Openg madahka iya andalka GPS ulih ngambi pulai penuduk Parlimen Selangau, Lubok Antu, Julau enggau Sri Aman.

“Nya alai, dalam GPS kitai mesti bekerejasama dalam sebuah perau napi PRU-15 ti deka datai.

“Nya mega nyadi kebuah penegap politik amat beguna lalu penyerakup entara kitai mesti dijaga enggau ditan,” ku iya.

Abang Johari bejaku munyi nya rambau Bejadika Aum Tiga Taun Sekali (TDC) Ke-5 Parti Rayat Sarawak (PRS) di sebuah hotel ditu, kemari.

Nangkan nya, rambau aum media enggau bala pemberita, Abang Johari madahka GPS endang udah besedia napi pengawa bepilih tu ila.

“Kitai enda nemu kemaya PRU-15 deka diatur tang siti pekara ti pemadu beguna dalam GPS, kitai seruran nyikap diri sebaka enggau Pengawa Bepilih Besai Nengeri (PRN) suba.

“Pekara nyikap diri tu enda ibuh dipadahka ngagai orang, chukup meh kitai bejalaika pengawa aja, awakka rayat ulih meda nama pengawa digaga kitai,” ku iya.

Lebuh ditanya pasal penuduk Parlimen ti nadai dikuasa GPS, iya enggai ngelansa pekara nya tang semina madahka pekara tu deka dipadahka ba maya ti engkeman ila.

“Baka nya mega enggau chalun (baikka bisi chalun indu tauka enda), aku nyerahka pekara tu ngagai PRS ungkup nentuka sapa ti deka diaku nyadi chalun maya PRU-15 ila sama baka kami nentuka chalun Parti Pesaka Bumiputera Bersatu (PBB).

“Aku enda ulih ngelansa dalam pekara tu ngarika PRS laban pekara nya pulai ngagai raban tuai parti tu empu,” ku iya.

Sama bisi datai Sekretari Besai GPS Datuk Seri Alexander Nanta Linggi, Presiden Parti Demokratik Progesif (PDP) Datuk Seri Tiong King Sing, Sekretari Besai Parti Sa’ati Rayat Sarawak (SUPP) Datuk Sebastian Ting, Pemangku Presiden PRS Datuk Joseph Salang Gandum, Sapit Presiden PRS Datuk Majang Renggi, Tuai Komiti Nembiak PRS Datuk Snowdan Lawan enggau ke bukai.

TERUS BESERAKUP…Datuk Patinggi Tan Sri Abang Johari (mua, tiga kanan) maya Bejadika Aum Tiga Taun Sekali (TDC) Ke-5 Parti Rayat Sarawak (PRS) ba sebuah hotel di Sibu, kemari.

Suara Sarawak