SARIKEI : Menteri ba Opis Premier Sarawak ke mega Kaban Kunsil Nengeri (Adun) Kakus, Datuk John Sikie Tayai dikenuku deka bediri minta pilih penuduk Presiden nyerumba pengawa bepilih dalam Parti Rakyat Sarawak (PRS) minggu baru.

Nampung penerang portal TVS madahka pekara nya dikenukuka, Sekretari Besai PRS Datuk Ir Janang Bungsu ti madahka, Sikie udah nganjung pom nyadi chalun.

“Keretas nyadi chalun ungkup pengawa bepilih minggu baru deka ditutup pagila (sehari tu). Naka tu, iya (John Sikie) udah nganjung (pom),” ku iya.

Iya madah munyi nya pengudah ngulu Program Randau Ruai Begulai Enggau Ketuai diatur Nembiak Rumah Tayan ditu, kemari.

Bela bisi ngulu pengawa nya, Adun Repok, Datuk Sri Huang Tiong Sii.

PRS diperintaka deka ngatur aum besai kena 23 enggau 24 April tu ila ba Sibu lalu pengawa milih ketuai dalam parti mega deka diatur.

Berita pemadu baru madahka Sikie ‘patut nganti’ nyema bisi chalun bukai dalam PRS bela keran ngisi penudk lumur satu parti nya.

Penuduk Presiden PRS puang pengudah Tan Sri Datuk Amar Dr James Jemut Masing midang kena 31 Oktober 2021.

Kenyau ari nya, penuduk Presiden dipangku sapit iya Datuk Joseph Salang Gandum.

Salang ke mega ex-Kaban Parlimen Julau entara nama ti kala disebut deka ngisi penuduk presiden baru PRS.

PRESIDEN BARU PRS?…John Sikie benung bejaku ba mua mayuh ba sebengkah pengawa ke diatur begulai enggau rayat, apin lama ke udah.-Gambar Ukas

Suara Sarawak