JULUK ATI… Kanang Usin ransing nyereta misyen niki Gunung Everest ngambi ngitau tambai Sarawak ba tuchung gunung pemadu tinggi ba dunya nya.

KUCHING: Bai ati keran ngemegah nama Sarawak, Kanang Usin, 42, ransing niki Gunung Everest taja napi mayuh pemar.

Pegawai VAT 69 Komando, Polis DiRaja Malaysia (PDRM) ke gawa di Kem Ulu Kinta, Perak nya begulai enggau dua iku raban VAT 69 Komando enggau tujuh iku peniki bukai disadang bekejang ke Nepal sebedau 15 April tu ungkup misyen Malaysia Sebilik Everest 2022.

Taja pia, peranak asal Rumah Semayong Binyo, Sebauh Bintulu nya napi penanggul ari sukut kereban diguna enggau belanja.

Nya kebuah, besai pengandal Kanang ngarapka bala tuai tauka Perintah Sarawak ulih mantu iya ngambi ulih ngitau tambai Sarawak ba tuchung gunung pemadu tinggi ba dunya nya.

Ku Kanang, iya udah minta saup ari seekda tuai Sarawak tang apin nerima bantu diguna nya ke alai belanja diguna siku peniki dipelaba urung RM50,000.

“Sebedau tu, Perintah Kedah enggau Pulau Pinang udah meri belanja ngagai pengari iya (peniki) sida tang ba Sarawak, aku apin nerima nama-nama,” ku iya nerang.

Ku Kanang, iya keran nyereta misyen nya ukai semina deka ngemujurka misyen Malaysia Sebilik Everest 2022 tang deka mai nama raban beuniform (PDRM) enggau Sarawak.

“Enda semua orang bulih peluang enggau benasip niki Gunung Everest lalu nadai kala peniki ari Sarawak bebansa Iban nyengkaum ari raban beuniform ti kala niki gunung nya.

“Nya kebuah, pekara tu ti meransang aku nyereta misyen nya ngambi ngarika Sarawak enggau PDRM,” ku Kanang madahka juluk ati iya.

Ngelansa pasal pengawa nyikap diri, Kanang madahka iya nadai napi penanggul ari sukut runding enggau pengering tubuh.

“Tang diatu aku nyikap diri deka nelebaka diri enggau penyelap di Gunung Everest peninggi 8,848 meter lalu gaya hari ba gunung nya naka penyelap,” ku iya nerang.

Iya ke rindu niki gunung lalu suah masuk pekit niki gunung madah, sida udah belatih niki gunung ba sekeda gunung di Semenanjung enggau mega di Gunung Kinabalu.

Suara Sarawak