ARAPKA MUJUR… Kanang begambar ungkup kenang enggau Nanta pengudah ngatur penemuai basa.

KUCHING: Anak Iban asal ari Bintulu, Inspektor Kanang Usin deka nempa sejarah kediri lebuh keran nyadi rayat Sarawak keterubah niki Gunung Everest, tuchung gunung pemadu tinggi di dunya.

Dikena meransang misyen sereta juluk ati Kanang, Premier Sarawak Datuk Patinggi Tan Sri Abang Johari Tun Openg udah nyuaka belanja ngagai iya ke mega pengari menua ba tim Eksplorasi Malaysia Sebilik Everest 2022.

Pengawa nyuaka pemeri sereta tambah Sarawak ngagai iya udah dipenyadi Sapit Menteri ba Opis Premier Sarawak (Pekara Korporat, Pemadah enggau Ukas), Datuk Abdullah Saidol ti ngarika Premier Sarawak di Kuala Lumpur, kemari.

Saidol madah, semua rayat menua tu deka besampika pemujur Kanang sereta tim ekspedisyen nya ngambi sida ulih niki gunung nya.

“Nyelai iya, tim ekspedisyen ari bemacham etnik sereta raban orang nyelai pendiau nunjukka pemesai reti kitai terus ngetanka penyerakup taja bebida penemu enggau nyereminka semangat Malaysia Sebilik,” ku iya.

Nangkan nya, Kanang, 42, ti gawa nyadi Pegawai VAT 69 Komando Polis DiRaja Malaysia (PDRM) di Kem Ulu Kinta, Perak deka begulai enggau dua agi raban VAT 69 Komando enggau tujuh iku peniki bukai deka bekejang ke Nepal sebedau 15 April tu.

Nambahka nya, iya meri terima kasih ngagai Premier Sarawak ke sukung sereta pemeri nya dikena meri peransang ngagai iya ngemegah nama menua.

Suara Sarawak