Karnival Gawai Tematu deka diatur 1-2 Julai

KUCHING: Sepengudah belega dua taun, Karnival Gawai Tematu 2022 enggau Bitanding Dayung Gawea Tematu 2022 deka diatur baru kena 1 enggau 2 Julai ti deka datai.

Chairman Pengatur Karnival Gawai Tematu 2022 enggau Bitanding Dayung Gawea Tematu 2022, John Pata James Jumin madahka ketegal pandemik Covid-19 karnival enggau pekit tu enda ulih diatur sepengelama dua taun.

“Nengah gerah ti dipadahka Menteri Besai Datuk Sri Ismail Sabri Yaakob, menua kitai udah ngalih ngagai endemik lalu tatak kapsiti udah nadai agi.

“Nya alai, taun tu kami ngatur karnival enggau pekit nya ungkup edisyen ti ke-7,” ku iya dalam siti penerang media, apin lama ke udah.

Ku iya, karnival enggau pekit tu ila deka diatur ba Balai Mensia Mayuh Kampung Tematu ngena rambai jaku ‘Adat Bidoyoh Puun Idip Bimadis’ ti mai reti ‘Adat Bidayuh Tiang Idup Bekaban’.

“Aktiviti pemadu besai deka diatur ila iya nya Pekit Dayung Gawea Tematu 2022, pengawa pemandang ari ejensi perintah, pengawa bejual asil betanam betupi, mandangka pemakai enggau ke bukai.

“Pom nyereta pekit Dayung Gawea Tematu 2022 deka berengkah diidarka kena 9 April tu ila ngena tali arus ke alai pekit tu tebuka ngagai indu dara Bidayuh ti beumur entara 18 nyentuk 28 taun di kandang menua Kuching, Bau, Lundu, Padawan, Siburan, Penrissen enggau Serian.

“Bayar penyereta pekit semina RM100 aja lalu haribulan tutup peminta pekit iya nya kena 8 Mei,” ku iya.

John madahka pom pekit nya ila deka dipadahka nengah Facebook Karnival Gawai Tematu dan Bitanding Dayung Gawea Tematu tauka betelefon terus ngagai iya empu ba lumur 019-8259395 enggau Leonora ba lumur 016-8723236.

Iya madahka, bala champion pekit deka nerima perais mata duit, trofi, hamper enggau ke bukai.

Chairman Program… John Pata James Jumin

Suara Sarawak