SRI AMAN: Kaunselor Andar Suntai dichiri nyadi Penghulu Iban baru ba sitak menua Sengat Atas di sitak Sri Aman.

Sapit Menteri Pelajar, Inovasyen Enggau Pemansang Penau ll Datuk Francis Harden Hollis madahka di Simanggang Penghulu Iban bisi empat iku.

“Bisi empat zon dikuasa Penghulu Iban di Dun Simanggang iya nya zon Mengeri Simanggang, zon Undop Tengah, zon Sengat Baruh enggau zon Sengat Atas.

“Aku meri terima kasih ngagai Perintah Sarawak kelebih agi Opis Residen Sri Aman laban udah ngemendarka zon penghulu baru dalam sitak aku tu,” ku iya.

Harden bejaku munyi nya rambau Program Nyirika Penghulu Iban Sengat Atas Kaunselor Andar Suntai di Rumah Impol Sungai Tenggak C ditu, kemari.

Lebuh bejaku Andar madahka iya berasai gaga seraya meri terima kasih ngagai Harden laban udah meri peluang nyirika iya mangku tanggungpengawa nyadi tuai ba genturung nya.

“Aku besemaya deka bejalaika tanggungpengawa tu baka ti dipinta perintah.

“Aku sedar tanggungpengawa tu enda muntang tang nyadi siku tuai sukung ari bala tuai rumah enggau peranak rumah panjai ulih ngasuh pengawa aku muntang,” ku iya.

Ba program nya mega Harden nyuaka bantu Projek Mit Pemansang Menua Pesisir (MRP) ngagai Tuai Rumah Impul ti mega Chairman Komiti Pemansang enggau Pengelikun Genturung Pendiau (JKKK) Kampung Sungai Tenggak C penyampau RM11,000.

Kelimpah ari nya, dikena nampung ungkus ngaga parit ti benung digaga diatu, iya mega meri bantu penyampau RM50,000 nengah bantu Program Transformasyen Menua Pesisir (RTP) Dun Simanggang.

Penghulu Iban Sengat Atas ti baru Kaunselor Andar Suntai.

Suara Sarawak