NGATUR RANDAU… Pengari ari DC&C enggau BBD sama datai ngundang sereta berandau enggau sida Robert enggau Poly sebilik.

KUCHING: Pemeri dipupu ari mensia mayuh deka dibagi bela lalu disimpan dalam akaun turu pelajar ketetiga anak niang Damian Senin enggau niang Ronwina Mambai.

Pemungkal Raban Pengasih enggau Budaya Dayak tauka Dayak Charity & Culture (DC&C), Lawrence Clement Ahsay madah, pekara nya udah dikerandau enggau orang ti ngibun tiga menyadi nya, Robert A/L Adi enggau aka iya, Poly.

Ku iya, sida berandauka chara mansut tauka nyuaka pemeri ngagai bala anak niang ngambi enda tebasau ngapa.

“Bala kami berasai lantang ati lebuh ninga sida tiga tu udah bisi akaun turu pelajar kediri empu.

“Nya alai, kami ngasaika manah agi pemeri tu dibagi bela penyampau lalu disimpan dalam akaun sida tiga empu, ke penabat dudi hari.

SIRUKA NEMBIAK… Lawrence mujur ngelembutka ati Magdelena lalu ulih ngambi iya.

“Tu mega ulih nyamin sida tiga nerima pelajar menyana enggau pengidup meruan,” ku iya lebuh dirandau Suara Sarawak.

Lawrence mega madahka diri chukup sinu lebuh tepedaka anak mua sida tiga menyadi ke agi mekang endar kelebih agi Magdelena ti baru beumur dua taun.

Iya ngasaika penguji ditapi tiga menyadi nya kelalu berat, tang kitai nadai daya, semina ngena chara meri bantu baka nya aja ulih nyaup ngesan penusah sida sebilik.

“Aku ngumbai diri ulih ngenatka ati sinu, enggai dipeda labuh ai mata tang aku alah lebuh terubah meda, betemu mua enggau endu Magdelena sereta dua menyadi iya ba rumah aya sida ditu.

“Enda berasai ai mata labuh lebuh meda mua tudah Magdelena ti empai nemu utai, ingatka iya nyau ngekal nyabak lebuh datai ba padang bilun empai lama.

IDUP MERUAN… Lawrence meri jaku peransang ngagai Elisia enggau Rayyan ngambi ngibun menyadi enggau diri empu enggau meruan.

“Sinu ati ninga sabak tudah suba lalu diatu nyau udah betemu mua enggau tudah ngasuh ati din balat agi sinu sereta kasih.

“Aku nguji nelebaka diri enggau iya, terubah dipeda baka ke nangi, tang nyau kelama baru iya deka diambi.

“Manis tuchum iya ngasuh ati aku majak ensiban. Chukup kasih meda anak gamal sida tiga menyadi,” ku Lawrence bekunsika asai ati iya lebuh ngundang sida ba rumah di Samarahan.

Ke penerang, pengawa mupu pemeri nya dipejalai raban DC&C enggau Bulang Birieh Dayak (BBD) kenyau ari 16 March ke alai tiap penerang nama enggau penyampau pemeri dikemaru nengah Facebook Lawrence Clement Ahsay empu.

Niang Damian Senin asal ari Kampung Daha Kisau, Tebedu di Serian seraya bini iya, niang Ronwina Mambai ari Simunjan, Samarahan, ninggalka tiga iku anak, Elisia Olivia (10 taun), Joseph Rayyan (lapan) enggau Magdelena (dua).

Seduai melaki bini ditemu bebadi nyawa dipelaba kena tangkap karan ba bilik mandi di sebuah rumah flat di Taman Puncak Tringkap, Brinchang, Cameron Highlands, Pahang kena 10 March tu tadi.

Tubuh seduai melaki bini mega udah ditanam ba Pendam Kristian MBSA Seksyen 21, Shah Alam, Selangor ke alai pengawa tembu urung pukul 5.30 lemai, 14 March.

SINU… Elisia mangku Magdelena enggau penuh pengasih.

Suara Sarawak