MUJUR…Entara bala bakih ti nyaup ngemujurka video lagu Betesau Gawai ke digaga ba Kampung Annas Rais, Padawan.

Dua iku sebakih, Jacob Ressa enggau Krisberne Fowler deka ngeluarka sebuah lagu Gawai beserimbai enggau pengerami Hari Gawai Dayak ti deka datai tu ila.

Ku Jacob, seduai iya deka ngeluarka lagu Gawai ti diberi nama Betesau Gawai dikena ngerichahka pengerami Gawai taun tu.

“Serak tu kami duai Krisberne semina ngemansutka siti aja lagu Gawai lalu arapka peminat ulih teperindang,” ku Jacob nyeritaka pasal lagu Gawai nya ngagai pengari Suara Sarawak, apin lama ke udah.

Nangkan nya, Jacob madah lagu nya mega ditengkebang penanyi, komposer ke mega DJ Radio CatFM, Maxwell Franklin Saran ke kala tebilang enggau lagu Bujang Sarawak.

“Lagu kami duai tu (Betesau Gawai) ditengkebang Maxwell sereta dirikod ba baruh perabung Assapai Muzik Production.

“Pia mega lagu Gawai aku enggau Krisberne deka dikeluarka nengah channel Youtube aja iya nya ba Jacob Ressa Channel,” ku iya.

Jacob mega ngarika bakih iya Krisberne madah, seduai iya deka ngujika rentak lagu ke baru bebida ari selama.

Ku iya rentak joget endang dipilih seduai iya dikena bala peninga ngansarka kaki enggau bebuti nyerumba Gawai Dayak.

“Kami duai ngarapka lagu Betesau Gawai tu ulih diterima peninga semua sereta mega bulih sukung. Tu mega keterubah iya kami duai bepadu nyawa dalam siti lagu bekenaka ngepan asal kitai Iban.

“Tuju kami duai bekenaka ngepan tu dikena mandangka ngepan asal kitai ngagai nembiak rebak baru ambika sama temegah enggau ngepan asal Iban,” ku tandu Jacob.

Jacob mega madahka, seduai iya ukai semina belagu aja tang deka nyadaka lagu Betesau Gawai tu enggau ati ti bisi ‘mood’ Gawai sereta ngena tebah nyawa alun lundai.

Kenu ku iya, Gawai Dayak tau tu disadang deka richah bekau dua taun nadai dirami ketegal pengerekai penyakit Covid-19.

Nangkan ke nya, Jacob madah pengawa ngaga video lagu tu udah mujur digaga ba Kampung Annah Rais, Padawan.

“Kebuah kami duai milih endur tu dikena ngelakuka sebengkah ari palan dagang temuai ke chukup manah ditapatka ba Padawan,” ku Jacob.

Udah nya, Jacob madah lagu Betesau Gawai tu nyeritaka kisah dua iku lelaki ti bebakih diau ba sebuah rumah panjai.

“Lebuh maya Hari Gawai datai, seduai iya chukup pengaga laban mayuh bala datai ari mengeri ke ulih pulai ngagai rumah panjai.

“Peluang nya mih dikena seduai iya begigaka tawing ke baru sepengudah jelungan maya bepangan,” ku iya.

Jacob meri terima kasih ngagai Suara Sarawak laban udah meri awak ngagai seduai aku bekunsika ke berita ke pemadu baru pasal lagu Gawai ari duai iya Krisbene.

Suara Sarawak