TERIMA KASIH WANDIE…Valnnie begambar kenang enggau Menijar Wandie Alie ENtertaiment, Wandie Alie (kanan) pengudah tembu Anugerah Malam Gala Muzik W&E Entertainment apin lama ke udah.

Siku agi penanyi baru ari menua Sibu, Velennie Olivia udah mujur mansutka sebuah lagu baruh dibaruh kompeni W&E Entertainment.

Maya dirandau Suara Sarawak, Velennie madah diri endang ari mit rinduka pengawa belagu diumbaka nerima sukung nadai belampung ari sida sebilik.

“Aku kira ke orang baru ba dunya industri pemerindang kitai Iban, enti dikira baru setaun udah masuk bidang tu.

“Cherita ari aku mega bedau tentu mayuh laban aku sempama anak mit ke ‘baru nemu ngelalau’.

“Taja pia, aku chukup beterima kasih laban aku ulih diberi peluang ngujika nasip ba industri tu tambah mega nya endang sebagi ari juluk ati aku ti deka nyadi penanyi kenyau ari mit,” ku iya.

LAGU SOLO KEEMPAT

Velennie mega madahka, naka tu penyampau lagu ke udah disadaka iya semina tiga buah aja lagu solo pemadu baru tuka iya ti keempat deka dikeluarka enda lama agi.

“Entara lagu ti udah disadaka aku iya nya diberi nama Siti Agi Peluang, Nasip Tua Enda Jadi enggau Madam Ke Pengerindu.

“Lagu baru ti deka dikeluarka enda lama agi iya nya Beserara Ketegal Nguai lalu aku arapka lagu aku nerima sukung ari bala peminat semua,” ku iya.

Nangkan ke nya, iya madah lagu tu ditengkebang Wandie Alie enggau menyadi iya empu ti benama Remy Anand.

LANSA KENANG

VALENNIE OLIVIA

Ngenang lagu ti kala disadaka iya, iya nya Siti Agi Peluang endang nerima sambut ti chukup manah ari bala peninga lalu iya arapka lagu baru Beserara Ketegal Nguai mega ulih diterima peminat.

“Genre lagu dikerinduka aku iya nya berentak klasik Iban laban bisi lengguk patah sada nyawa manah amat ti kitai nyadaka genre tu.

“Arapka jemah ila aku ulih mai genre tu dikena ngemantupka ati ti rinduka rentak klasik sereta mega ulih ngenang nolstagia lagu lama,” ku iya.

Pia mega ku iya, sekumbang ke udah begelar penanyi, iya enda ulih lari ari mayuh macham penguji ti bisi nyadi ba dunya pemerindang.

“Laban ke udah bisi ruang bilik ke diri empu sereta mega udah bisi anak, enti aku deka ngerikod lagu tauka begagaka klip video, aku endang dulu berandau enggau kami sebilik.

“Laban anak tinggalka kediri lalu mesti bisi orang ngemataka sinu ga ati ninggalka tudah anak enti mindah kulu kili.

“Bisi mega ati deka nitihka chara penanyi ke bukai ulih mindah kulu kili belagu merindang peminat, tang enggai nyadi laban aku mesti minta pemendar dulu ari orang ke patut,” ku tandu Velennie.

Iya mega ngembuan pengingat ke dikenang lebuh maya ngerikod lagu kelebih agi keterubah tama studio.

“Ati asaika chukup rindu laban meda diri empu ulih datai ba tikas baka ke diatu taja agi mayuh utai ti deka dipelajarka agi ari bala kaban artis ti udah jelai nama ba dunya pemerindang.
 
ENGGAI NGELEBU PEMINAT

“Runding maya ngerikodka lagu endang deka ngaga pemadu manah ari aku ungkup bala peminat ambika sida enda lebu ningaka lagu ari aku,” ku iya.

Ba Anugerah Malam Gala Muzik W&E Entertainment tu empai lama, iya mujur nerima dua iti anugerah ari mayuh kategori ti bisi diperebutka.

Iya mujur menang ba anugerah Vokal Indu Pemadu Manah enggau Penanyi Baru Ti Dikearapka lalu nya mih nyadi kelai tanda iya udah nyingkang ke mua ba industri muzik Iban.

“Aku meri terima kasih ngagai Menijar W&E Entertainment Wandie Alie ti udah meri aku pengarap ke besai enggau peluang ngerikod lagu ba baruh perabung sida.

“Arapka anugerah ke udah diterima aku ulih meransang aku lebih chakah sereta ngetanka aku nyadi siku pemerindang ba menua kitai di Sarawak,” ku iya.

Velennie mega mesan semua peminat arapka enda leju meri sukung ngagai iya ambika iya ulih nyingkang nitihka penanyi ti udah nyulut ba pengawa belagu.

“Teruska sukung kita ngagai aku sereta mega ngagai penanyi kitai Iban ke bukai ambika standard lagu kitai Iban majak tebilang sereta dikelala orang selampur dunya.

“Ngagai peminat, kita tau “cover” lagu ari aku ambika kitai sama bela rindu sereta teperindang sereta mega aku meri besai terima kasih ngagai kita semua,” ku tandu Velennie.

Nuju bala peminat Valennie Olivia kita tau ngiga sereta ningaka lagu ari iya ba channel Youtube iya empu Valennie Olivia enggau Wandie Alie Entertaiment.

Suara Sarawak