KUALA LUMPUR: Sepenyampau lima Projek Perengkaguna Rama (PAMS) 2022 udah dikemendar Opis Menteri Pemansang Menua Pesisir (KPLB) ungkup Sitak Parlimen Saratok.

Sapit Menteri Pengeluar Kuasa enggau Pengeraja Asal, Datuk Ali Biju madah, kesemua lima projek PAMS beungkus RM2.43 juta nya deka dipejalai enggau lengkas.

Ku iya, lima projek nya nyengkaum Projek Ngaga Baru Jematan Rumah Ganya, Nanga Lempa, Kabo beungkus RM500,000.

“Udah nya Projek Ngaga Selapat ba Genturung Rumah Charles Martin, Sungai Belong, Melupa ngena ungkus RM130,000.

“Pia mega Projek Ngaga Selapat Gabian ba Tebing Sungai Rumah Melissa, Babang, Krian beungkus RM800,000.

“Bela RM500,000 diagihka Projek Ngaga Jematan Ibeam Di Rumah Robert Lin, Kedap, Melupa enggau Projek Ngaga Baru Jematan Ibeam Di Rumah Jimbat, Lubok Ijok, Awik,” terang iya.

Ali ke mega Kaban Parlimen Saratok mansutka jaku nya nengah sebengkah penerang berita ditu tadi.

Iya madah, Opis Entali Ai enggau Parit (DID) udah dipadu Perintah Besai nyadi ejensi bejalaika projek seraya tinda deka dibuka enda lama agi.

Nambahka nya ku iya, sekeda projek udah tembu lalu sekeda ke bukai agi dalam perambu lalu pengawa deka dirumban ungkup pengelantang rayat.

“Aku deka meri besai terima kasih ngagai Perintah Besai nengah KPLB enggau Opis Pelilih Saratok ngarika rayat menua tu laban udah ngasuh langgur projek perengkaguna rama ti dipinta rayat tu nyadi nyata.

“Projek tu endang ditemu deka meri pemaik enggau penguntung besai ngagai rayat ditu kelebih agi ari sukut pemansang infrastruktur pemun,” ku Ali madah nyemetak.

Datuk Ali Biju 

Suara Sarawak