NAMPUNG PENGELANDIK ASAL… Menou entara orang ke landik betenunka pua kumbu di Rumah Emak.

REBAK biak diperansang sama nyagu enggau ngemeran bemacham pengawa asal kitai Iban baka beranyam, betenun enggau ke bukai ngambi enda punas disegang arus pemansang dunya.

Menou Libau, 64, asal ari Rumah Emak, Sungai Sut Kapit madah, kitai anang sesekali ninggalka pengawa asal Iban taja dunya kemaya hari tu udah maju.

“Bala nembiak patut nali pengelandik asal tu sereta belajarka pengelandik tu ba sida ke udah landik ba pengawa asal kitai Iban.

“Enti enda nemu, bala nembiak diperansang mupuk belajar ngambi bisi ke ganti kami jemah ila.

“Munyi ku jaku sempama baka ijok tamping penduk, baka rutan tampung danan, baka ira tampung lemba, baka wi tampung tali.

“Pechah periuk tanah ganti periuk tani, padam bulan ganti matahari, parai orang ke tuai ganti tubuh kami, pambu orang ke dulu ganti kami ke dudi,” ku jaku peransang Menou.

PENGELANDIK ASAL

Ngepunka randau, Menou madahka diri belajarka pengawa betenun tu kediri maya agi dara suba.

Ku Menou, pemuas ke meda sida serumah betenun dia iya tekait ati deka ngujika pengelanchat jari diri betenunka pua kumbu tu.

Iya madah, pengawa betenunka pua kumbu tu endang bisi penti pemali kediri empu.

“Baka aku tadi, enti betenunka pua kumbu endang besampi tauka miring dulu ngambi semua rurun betenun tadi lanchar dikereja.

“Maya agi dara suba, rindu endar meda sida ke tuai, bala sa indai enggau ibu di rumah panjai betenunka pua kumbu tu.

“Bemacham ukir ditenun sida, nya kebuah nyau tekait ati sereta deka nguji ga tudah diri suba laban pengawa betenunka pua kumbu tu endang sebagi ari pengawa ke chukup untung.

“Ari suba, pua kumbu tu endang untung amat enti dijual. Nya kebuah aku sigi landik betenun nyentuk sehari tu.

“Naka diatu, nadai orang belajar betenunka pua kumbu ari aku, nyangka dudi hari ila bisi orang deka belajarka pengawa asal kitai Iban tu laban sayau endar enti pengawa tu enda ditampung,” ku iya nerang.

Kenang penuh dibacha ba lambar Ruai 4 pagila

ALUS… Pemanah kain pua kumbu ditenun Menou udah mansutka mayuh asil.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak