KUCHING: Menteri ba Opis Menteri Besai (Parlimen enggau Undang-Undang) Datuk Seri Dr Wan Junaidi Tuanku Jaafar madahka diri asa lebuh pengawa bejuraika Rang Undang-undang (RUU) Anti Lompat Parti ditangguh baru.

Enti nitih, RUU nya dipejurai ba Aum Parlimen khas kena 11 April tu tang enda ulih dipejalai laban Kabinet enda setuju lalu dekaka reti nya dipansik silik.

Taja pia ku Wan Junaidi, iya nerima pekara nya laban Kabinet nya kuasa pemadu tinggi dalam menua ngambi ngaga pemutus.

“Aku endang asa lebuh pengawa bejuraika RUU ditangguh pengudah lapan bulan bebendar gawa ngemujurka pekara nya.

” Taja pia, aku mesti nerima pemutus tu laban Kabinet nya kuasa pemadu tinggi lalu aku ke nyadi kaban mesti nitihka pemutus nya,” ku iya nerang.

Taja pia, Kaban Parlimen Santubong nya madah nyemetak, inisiatif iya ukai naka nya aja laban RUU nya deka dipejurai ba sebengkah Aum Parlimen khas ke deka dipadahka Menteri Besai Datuk Seri Ismail Sabri Yaakob seriris enggau Peraturan 11 (3) Peraturan Peraturan Dewan Rakyat dan Dewan Negara.

“Arapka semua pengawa ku mujur dipejalai lalu semua raban bekaul naka ulih meri sukung,” ku iya nerang.

Ku Wan Junaidi, RUU nya deka dianjung baru ungkup pansik silik bekaul reti ‘lompat parti’.

Nambahka nya, iya ngenggaika jaku “sabotaj politik” lebuh nangguhka pekara tang nya semina bebida penemu lebuh netapka sekeda pekara dalam RUU nya.
Sebedau tu, Wan Junaidi madah, bisi 39 iku Kaban Parlimen ba menua udah tu udah merejuk Parti kenyau ari taun 2018 nyentuk diatu ngujungka politik menua begilik sereta betukar tiga iku Menteri Besai dalam siti penggal Parlimen.

Dulu ari nya, enti nitih RUU nya dipejurai ba Aum Parlimen bulan March tu tadi nyengkaum RUU natak timpuh mangku pengawa nyadi Menteri Besai ngagai dua penggal aja tang RUU nya deka dipejurai kena 11 April tu.

Kelimpah ari nya, Aum Parlimen khas di Perambu kena 11 enggau 12 April tu deka ditampung nitihka perambu ngambi berandau enggau bejuraika RUU Perlembagaan (Pindaan) (No. 3) 2022.

Nya alai, kededua raban madahka diri deka meri sukung nentuka RUU tu bulih majoriti dua pertiga ba Aum Parlimen khas kena 11 enggau 12 April tu.

Datuk Seri Dr Wan Junaidi

Suara Sarawak