MP Mas Gading ngabas dua ruang bilik ke tasah angus ba Kpg Sebiris

BAU: Dua pintu ruang bilik di Kampung Sebiris ti dituntung penusah angus rumah empai lama udah nerima bantu ari Kaban Parlimen (MP) Mas Gading, Mordi Bimol.

Sepengudah ninga berita nya, Mordi sereta raban staf ari Opis Servis Kaban Parlimen (PKM) Mas Gading enggau lengkas datai kia ngulurka bantu.

Bantu mata duit diulurka Mordi dikena ngelempungka tating pengidup sida iya.

Sepengudah beratika penusah sida iya baru, PKM Mas Gading deka nambahka agi bantu dikena nyaup ngaga baru rumah sida ke udah angus besemak endur nya.

Pia mega, bantu ti deka diberi dudi tu ila nyengkaum meri barang enggau perengka ke diguna sida iya besehari-hari.

Ke penerang, penusah angus tu diripotka nyadi urung pukul 2.00 pagi ti ngujungka dua buah unit rumah besapit angus lengis.

Dua unit rumah besapit tu dipenggi Agat enggau sebuah agi rumah dipenggi menantu iya, Hazizul.

Sida Hazizul sebilik bisi empat iku nyengkuam bini dua iku anak ti beumur tujuh enggau tiga taun.

Penusah tu mega udah nerima perati ari Kaban Kunsil Nengeri (Adun) Opar enggau ejensi ke bukai ti sama deka datai ngulurka bantu ngagai sida iya.

Ba penusah tu, nadai orang bebadi nyawa tauka bakal ba batang tubuh lalu api mujur dipadamka raban Bomba.

BANTU…Mordi nyuaka bantu ngagai peranak ke dituntung penusah angus rumah ba Kampung Sebiris.

Suara Sarawak