LANDIK…Nancy benung nguji nganyam produk krafjari rambau ngabas Krafjari Malaysia Pampang Sarawak kena 21 Februari 2021 suba.

Industri kraf jari siti ari pengelandik ti mayuh dikembuan rayat Sarawak kenyau ari kelia kelebih agi ba raban bansa Dayak.

Pengelandik tu majak lenyau enti enda ditanka nyadi siti ari pesaka asal menua baka penau nempa duku, ngaga keris, ngaga lesung, ngaga kain kebat, ngaga tawak, beranyam, ngukir, ngaga perau enggau pengawa bukai.

Dikena ngetanka pengawa tu terus diintu, perintah numbuhka Palan Krafjari Malaysia awakka ulih ngumpul semua pengemeran kraf jari menua lalu ngajar nembiak rebak baru nampung pengawa nya.

Taja pia, bekau Covid-19 pengawa tu tejanggal mimit laban nitihka Atur Pengawa Standard (SOP) ti dipejalaika perintah.

Diatu, industri kraf jari menua berengkah ngerembai pengudah nerima bantu ari perintah kelebih agi rambau pengerekai penyakit Covid-19.

Menteri Dagang Temuai, Seni enggau Main Asal (Motac) Datuk Seri Nancy Shukri madahka Krafjari Malaysia bisi nyendiaka bemacham bantu bepelasarka peminta komuniti dagang.

BERANDAU…Menteri Dagang Temuai, Seni enggau Main Asal (Motac) Datuk Seri Nancy Shukri benung berandau enggau bala temuai ti bisi datai rambau Program Bersungkei Motac Sarawak di Kraftangan Malaysia Pampang Sarawak ditu kena 22 April tu tadi.

“Ambika chunto maya pengerekai Covid-19 perintah bisi nyendiaka pakej peransang dikena meri peluang ngagai raban pengemeran industri tu enggau orang baru ngambi latih.

“Entara sida tu iya nya mungkur raban indai tunggal, raban B40, orang ti lenyau pengawa enggau orang bukai ti balat napi penanggul ketegal Covid-19,” ku iya.

Nancy bejaku munyi rambau Program Bersungkei Motac Sarawak di Krafjari Malaysia Pampang Sarawak ditu kena 22 April tu tadi.

Ku iya, latih pengelandik tu udah mayuh diatur ba kandang menua pesisir enggau palan ti dikelala opis menteri ngembuan peluang besai ngelakuka dagang kraf jari.

“Aku ulih madahka, industri krafjari kitai tegap, aku meri terima kasih ngagai Kraftangan Malaysia laban bebendar nyeridi raban tu rambau pengerekai Covid-19.

“Tu nyengkaum perati sida ngagai komuniti Penan.

“Perintah mega mayuh meri bantu peransang ngagai bala orang dagang endur ngelakuka produk sida,” ku iya.

Iya meri chunto dagang kraf jari ngaul peranak di Ba’Kelalan ti sebedau tu enda kala ngaga batik.

“Sida enda nemu ngaga batik, tang udah diberi latih dalam kandang beberapa hari aja sida udah landik.

“Aku gaga meda sida landik ngaga batik ngena penatai rampa menua baka daun, rumput enggau akar kayu.

“Enti ba Lawas, kami ngelala palan nya mayuh bala penau ti nemu ngaga duku enggau sarung duku ti diukir lalu dichat awakka ulih dijual,” ku iya.

Nancy mega madahka, sida mega mantu raban pengemeran krafjari tu bejualka produk sida nengah online ke alai pekara nya ulih nambahka penatai pemisi sida taja pan diau di menua pesisir.

“Entara pengawa ti digaga kami mantu ngelakuka produk sida iya nya ngatur E-Kraf Bazar, MyCraftShopee enggau ke bukai,” ku iya.

MANAH…Entara produk kraf ti ulih nyadi dagang sereta nyadi pun penatai pemisi rayat.

Suara Sarawak