SERIAN: Penumbuh Palan Servis Sarawak di Serian kenyau 13 September taun nyin kemari ngerikodka penyulut ti manah laban nerima penatai urung 300 ngagai 500 iku penguna sehari.

Sekretari Perintah Sarawak Datuk Amar Jaul Samion madahka naka 31 March tu tadi, palan nya udah meri servis ngagai lebih 28,826 iku penguna ngaul 41,962 transaksyen.

“Palan tu nyadi siti ari pengawa Perintah Sarawak deka ngemuntangka semua pengawa rayat ti bekaul enggau ejensi Perintah Sarawak.

“Servis Sarawak nyadi inisiatif transformasyen servis mensia mayuh ngemanahka enggau negapka sistem raban gawa di mua ejensi perintah di menua,” ku iya.

Jaul bejaku munyi nya rambau Bejadika Palan Servis Sarawak di Serian ditu, kemari.

Ku iya, Palan Servis Sarawak di Serian tu nyendiaka servis ti sama enggau lima buah palan servis ti udah bisi ba Sarawak sebedau tu iya nya Kuching, Sibu, Miri enggau Sri Aman.

Iya nandu madahka, jam operasyen palan nya ninting dibuka Hari Satu ngagai Hari Enam enggau ari pukul 8 pagi nyentuk pukul 5 lemai ke alai palan nya tutup kena Hari Minggu enggau kemisi hari besai.

Iya nangkan ke nya pechaya, palan tu ulih meri mayuh pemaik ngagai peranak di Bagi Menua Serian.

“Keterubah, palan tu ngemuntangka rayat meresa bil enggau bebayar bemacham bansa bil baka bil ai, kuasa karan, chukai pintu, chukai tanah enggau ke bukai ba siti kaunter ti sama ti semina nguna MyKad aja.

“Kedua, servis tu enda semina ditatak ngagai peresa bil enggau bayar bil aja laban ulih mega ngaga mayuh peminta baka peminta bantu indai beranak, Kenyalang Gold Card enggau peminta bukai.

“Naka tu, bisi 51 bansa servis ari 38 ejensi Perintah Sarawak bisi digaga ditu,” ku iya.

Iya madahka, kelimpah kaunter palan tu mega bisi nyendiaka kiosk bayar ti ulih dikena sebarang maya pengudah palan nya tutup pukul 5 lemai.

Sama bisi datai Residen Bagi Menua Serian Tuah Suni, Direktor Unit Pemodenan Servis Nengeri (UPPN) Michael Ronnie Langgong enggau ke bukai.

MANAH…Sekretari Perintah Nengeri Sarawak, Datuk Amar Jaul Samion bisi nguji ngasaika servis bebayarka bil ari staf opis perintah ba Pengawa Bejadika Palan Sevis Sarawak Serian. Bela dipeda Residen Serian, Tuah Suni di Serian kemari. -Gambar Ghazali Bujang

Suara Sarawak