SIBU: Parti Bansa Dayak Sarawak (PBDS) sedia nukangka pintu ngagai Sapit Menteri Pengawa Bekebun enggau Komoditi Malaysia, Datuk Willie Mongin nyemilik parti nya.

Sapit Presiden PBDS, Julius Enchana madahka, penatai Willie enti iya deka nyemilik parti tu endang disambut enggau pengaga ati.

Ku iya, PBDS tu parti ke pemadu engkeman alai Willie neruska pejalai politik iya enti nyema iya (Willie) “dikelaungka” ba Pengawa Bepilih Besai (PRU) ti deka datai tu ila.

“Enti Willie nyemilik PBDS, iya endang tetap dipilih kami ngarika parti tu ba PRU ila enti iya udah ngerejista diri nyemilik kami.

“Enggau meda gaya politik menua kitai ti bedau tentu tegap, tu mih chara ti paling selamat enti iya masuk PBDS,” ku Julius nengah sebengkah penerang madah ngagai pengari Suara Sarawak.

Willie ti mega Kaban Parlimen Puncak Borneo endang ngembuan chara ti engkeman nyadi ketuai kelebih agi diatu PBDS udah bisi 30 peratus raban parti ari bansa Bidayuh.

Ku iya, tu kelebih agi enggau Dr Bego Sepop (Mandal Presiden) enggau Saini Kakong ti dipaduka nyadi Tukang Wang PBDS.

Ditambahka mega Patrick Anek Uren enggau Anthony Nais sama bela dalam bilik PBDS ti udah ngayanka parti tu diterima bansa Bidayuh.

Tang ku Julius, semina Wilie aja mih nemu ni bagi pemutus ke betul ungkup pejalai politik iya kelebih agi ba sitak Puncak Borneo.

Ba pekara ke sama mega, Julius ngarapka raban bansa Bidayuh terus meri sukung ngagai PBDS ambika parti tu semampai tegap.

“Ke diatu, PBDS udah dipasuk 30 peratus menyadi kitai bansa Bidayuh lalu aku arapka ba taun ti deka datai mayuh agi sida iya nyemilik PBDS.

“Ambika pengingat, ba taun 80 enggau 90-an menya, PBDS udah kala nerima sukung ti kuat ari komuniti Bidayuh lalu kami arapka semangat Dayakisme tu agi bedau baka ke suba,” ku tandu Julius.

Iya mega madahka, naka ke diatu semina mimit aja Orang Ulu ke udah ngerejista masuk nyadi raban PBDS.

“Aku arapka ketuai Orang Ulu baka Baru Bian, Stanley Ajang Batok enggau ke bukai pulai baru ngagai bilik PBDS.

“Jaku aku endang terang, nama utai digaga kita suba lalu diatu kitai agi mengkang nitihka nya ari pun suba.

“Laban nuan enggau aku sama Dayak, kitai agi bisi penanggul, agenda enggau jalai ti sama,” ku jaku Julius.

Sapit Presiden PBDS Julius Enchana

Suara Sarawak