KUCHING: Pemutus ngirai chalun baru bediri ba pengawa bepilih endang pengawa ke patut enggau lama udah dipejalai mayuh parti politik.

Mandal Presiden Parti Pesaka Bumiputera Bersatu (PBB), Datuk Seri Abdul Karim Rahman Hamzah madah, pengawa nya nipakka peminta rayat dekaka genap pengari rayat mai ubah.

“Maya pengawa bepilih diatur, orang ke menang deka mengkang mangku penuduk nya ungkup timpuh lima taun.

“Enti sema nadai ubah, timpuh nya deka abis baka nya lalu aku pechayaka pengundi tentu enda lantang agi sereta dekaka sitak sida bisi berubah,” ku iya.

Karim mansutka jaku nya lebuh dipinta ngelansa penerang Premier Sarawak ke mega Presiden PBB Datuk Patinggi Tan Sri Abang Johari Tun Openg pasal parti nya deka ngirai chalun baru ba Pengawa Bepilih Besai Ke-15 (PRU-15).

Adun Asajaya nya bechuntoka Pengawa Bepilih Nengeri ke-12 (PRN-12) Sarawak lebuh Gempung Parti Sarawak (GPS) mayuh ngirai chalun baru enggau chalun biak.

“Pekara tu udah ngenataika asil positif engka laban bala pengundi ngasaika chalun baru tu mantaika juluk ati sida.

“Nya alai, pekara ke dipadahka Premier nya betul, tentu deka bisi chalun baru maya PRU-15 ila,” ku iya nerang.

Minggu nyin tadi, Abang Johari madahka PBB deka ngirai chalun baru maya PRU-15 beduduk ari bisi Kaban Parlimen ari parti nya udah madahka diri enggai bediri.

Ku iya, bisi sekeda madahka udah datai maya sida ngiga penganti sereta meri awak ngagai orang bukai.

Suara Sarawak