SARATOK: Pala paip dibuka tauka disebut ‘washout’ ba simpang rumah panjai Sungai Sarang, Lichok ti dikereja orang enda mereti ngujungka bekal ai ba genturung simpang Roban ke Brayang tejanggal.

Kaban Parlimen Saratok, Datuk Ali Biju madah, raban ari Palan Servis P.205 Saratok udah betanya terus ngagai raban Opis Bekal Ai Menua Pesisir (JBALB) Betong berindik ari sebana dikenatai mensia mayuh pasal penanggul nya.

Ku iya, raban JBALB udah nerangka sida udah bejalaika pansik ba taba pengudah nerima ripot bekal ai tejanggal.

“Ari pansik dipejalai, raban JBALB udah tetemuka ‘washout’ ba simpang rumah panjai Sungai Sarang, Lichok ke alai pala paip dibuka orang ti nadai mereti.

“Udah ‘washout’ nya ditutup, bekal ai ba genturung dia nyau belubah pulai baka selama.

“Taja pia, menua bebukit enggau genturung ba ujung sambung paip begunaka timpuh ti lama endur bekal ai pulai meruan.

“Bekal ai deka pulai deras baru tang chara berenggat,” ku iya ba sebengkah penerang berita ditu tadi.

Nya alai Ali arap enggau ngelalau peranak dia enda ngereja ulah enda mereti baka nya ti ngasuh peranak bukai bela tusah.

Ngelansa pasal isu bacha meter bil ai diambi raban JBALB ku iya, pekara nya endang betul.

“Ari nya tadi, raban JBALB merambu ngagai bala penguna meresa sistem sambung paip ba genturung rumah sida empu tauka betanya ngagai Opis JBALB Bagi Menua Betong tauka JBALB Pelilih Saratok ngambi pengawa bukai ulih dipejalai enggau lengkas,” ku Ali madah nyemetak.

Datuk Ali Biju

Suara Sarawak