Pengajar Nurnadirah siku ari pengajar ti enggau ngemujurka RBL ba Rumah Panjai Nawin.

KUCHING: Pengawa ngajar orang tuai enggau ngajar nembiak siti pekara ti chukup bebida ngagai siku pengajar enti enda sabar enggau tan ati.

Kelebih agi lebuh kitai ngajar orang tuai di rumah panjai ti kekadang ngereja pengawa di luar baka bumai, bekebun enggau betanam sayur.

Tang pekara tu enda nyadi penanggul ngagai siku pengajar sekula di menua pesisir neruska siti ari Program Ruai Based Learning (RBL) Sekula Primari (SK) Nanga Oyan di Kapit.

Nurnadirah Khairul Annuar Asya’ari, 30, asal ari Belaga madahka program rumah panjai angkat nya udah meri empas manah ngagai peranak di rumah panjai pasal guna pekara pelajar ngagai nembiak rumah panjai.

“Nembiak di rumah panjai enggau di mengeri enda sebaka laban nembiak di mengeri sigi mayuh penatai penemu pasal pekara pelajar, semina nanyaka sida deka belajar tauka enda aja.

Pengajar Nurnadirah benung ngajar peranak rumah panjai nulis urup.

“Tang nembiak di rumah panjai tebal agi bepanggai ngagai apai indai ti nyukung sida belajar ngira sukut belanja, perengka pengangkut enggau penyedar apai indai pasal pekara pelajar tu,” ku iya lebuh dirandau Suara Sarawak, apin lama ke udah.
Ku Nurnadirah, ngerunding pekara nya sida ba SK Nanga Oyan enda belampung ati mantu bala apai indai belajar nyepil, nulis enggau macha ba rumah panjai.

“Lebuh apai indai sedarka pekara pelajar tu amat beguna, sida deka bebendar mantu bala anak ngulihka pelajar di sekula, ari nya bala anak muntang datai ke sekula ngiri penemu.

“Program kami tu berengkah ari ngajar sida nyepil urup, nulis urup mit enggau urup besai sereta belaguka urup ABC,” ku iya.

Nurnadirah madahka penanggul ngulihka perengka pengangkut nyadi pemar besai ngagai iya ngusung rumah panjai laban begunaka perau nyemerai ke seberai.

Bala peranak di Rumah Panjai Nawin ulih belajar nyepil, nulis enggau macha laban program RBL bisi diatur ba rumah panjai sida.

“Taja pan, rumah panjai tu semina ba seberai aja, kami mar ngusung sida laban peranak rumah panjai ti bisi perau ngambi kami engka benung gawa ba umai tauka bekebun.

“Kelimpah ari nya, penatai bala peranak rumah panjai enggau kelas mega nyadi pemar ngagai aku laban sida tu tebal agi bumai enggau bekebun.

“Nya alai, aku nyau bepesan ngagai bala nembiak dulu ngasuh sida madah ngagai apai indai haribulan enggau jam aku datai kin,” ku iya.

Iya mega madahka, palan ti strategik mega nyadi pemar sida belajar ketegal ruai tu sebuah palan ti luas tauka palan kunsi mensia mayuh.

“Enti kami benung belajar, bala nembiak begagai ba ruai enggau bemain, kekadang sida ngachau bala apai indai ti benung belajar.

“Nya ngasuh kami ti benung belajar enda ulih fokus belajar laban palan endur belajar nya inggar,” ku iya.

Ku iya, kenyau program nya diayanka apai indai nunjukka semangat sida nitihka program tu majak manah.

“Kala sida minta aku ngaga kelas tu malam hari, tang ketegal penanggul baka perengka pengangkut enggau pengelikun ba sungai aku enda ulih nangkup peminta nya.

“Lebuh kami ngatur program tu, orang bukai ti enda sedar sebedau tu bisi nunjukka minat deka enggau, ari nya program tu diteruska belama laban bala ti deka enggau program enda ngetu.

“Bekau ari pekara tu, runding sida ti ngelama tu enda entu meri perati ngagai pekara pelajar bala anak ulih diubah laban sida berengkah sedarka penemu belajar ulih ngubah tikas pengidup,” ku iya.

Ungkup penerang SK Nanga Oyan ngatur program ngajar orang tuai di baruh RBL ngagai sepuluh buah rumah panjai besemak sekula nya di Kapit.

Program ngajar orang tuai tu mega nyadi teladan ngagai bala nembiak besekula ngambika sida terus nanam semangat enda ngetu ngiri penemu baikka umur agi biak tauka udah lunggar umur.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak