Datuk Seri Lee Kim Shin

KUCHING: Taga penerebai bilun Firefly ari Pulau Pinang ngagai Kuching, Sarawak ti keterubah deka berengkah kena 11 April tu.

Menteri Perengka Pengangkut Datuk Seri Lee Kim Shin madahka serikat penerebai bilun nya udah netapka atur pejalai ari Pulau Pinang ngagai Kuching kena 11 November taun siti nyin kemari ungkup dua kali seminggu tang bisi penanggul enda ulih diseliah ngujungka pejalai nya diatur Malaysia Airlines Berhad (MAB) dulu.

“Kena 11 Disember 2021, Komiti Penyangga Penusah Nengeri (JPBN) udah ngaga pemutus nambahka semua penerebai tama ke Sarawak ari 223 kali ngagai 307 kali penerebai seminggu, ke alai penerebai MAB ari Pulau Pinang ngagai Kuching ditambah tujuh kali seminggu.

“Taja pia, kena 10 Januari 2022, Firefly Sdn Bhd udah minta operasyen pejalai sida ari Pulau Pinang ngagai Kuching dipulaika baru lalu pemutus nya udah dikemendarka JPBN kena 4 Februari tu tadi,” ku iya nengah siti penerang sehari tu tadi.

Kim Shin meri terima kasih ngagai raban pengatur Firefly ti betuaika Tuai Pemesai Eksekutif Phillip See laban udah ngatur penerebai keterubah ari Pulau Pinang ke Sarawak.

“Aku ngarapka tu siti kelai penyulut serikat penerebai bilun di Sarawak.

“Naka u, semina sebuah serikat penerebai aja ti ngena pejalai ari Pulau Pinang ke Kuching iya nya Airasia Berhad nengah 14 pejalai ninting minggu.

“Nya alai, aku ngarapka dua buah serikat penerabai bilun tu ulih ngatur mayuh agi pejalai ungkup pilih penerebai, tambang ba rega ti patut enggau narit mayuh agi penumpang ari Semenanjung Malaysia datai ke Sarawak,” ku iya.

Suara Sarawak