ANGUS LENGIS…Pengagit sebuah ruang bilik deka ngintu Hari Raya Aidilfitri bebali nyadi penusah pengudah rumah sida angus lengis.

BINTULU: Pengagit sebuah ruang bilik ba Kampung Yoh, Sebauh ditu deka ngintu Hari Raya Aidilfitri enggau diri sebilik taun tu betukar sinu pengudah rumah sida dituntung penusah angus lemai kemari.

Nitihka penerang ari Bilik Ngatur Operasyen Balai Bomba enggau Penyah Penusah (BBP) Bintulu madahka sida nerima kangau telefon ari siku orang periman bekaul enggau penusah nya urung pukul 12.46 tengah hari.

Berebak enggau nya, BBP Bintulu nganjung raban sida ke betuaika PBK 2 Fabian Andy ngesah penusah nya.

“Lebuh kami datai ba palan penusah nya urung pukul 1.53 lemai endang amat bisi penyadi penusah angus ke nuntung sebuah rumah seringkat bansa dampa.

“Raban kami ke dibantu raban ari BBP Samalaju enggau naka ulih madamka api ke benung nganguska rumah nya tang rumah nya enda mujur diselamatka lalu angus lengis,” ku padah Fabian.

Nambahka nya, Fabian mega madahka dua iku indu besai tuai, siku nembiak mit lelaki enggau siku nembiak mit indu ke nguan rumah nya mujur nyelamatka diri.

Enggau nya, nadai orang diripotka bebadi tauka bakal ba batang tubuh berebak ari penusah angus nya lalu operasyen ngerara api nya mujur diketuka urung pukul 2.41 lemai.

Ba penerang nya mega, Fabian madahka pun penyadi penusah angus enggau ungkus pengerugi reta tengkira ke ditapi tudah sebilik benung dipansik silik.

Suara Sarawak