Pengajar SK Nanga Oyan nyendia kereban bacha ba ruai rumah panjai
PENGAWA BADAS…Mohamad (tiga kanan) bejadika padung bup enggau ruang khas dikena bala nembiak macha bup di ruai.

KUCHING: Bekau timbal positif ari bala apai indai di rumah panjai pasal penyedar belajar enggau besekula dia bala pengajar di Sekula Primari (SK) Nanga Oyan Kapit bisi meri kereban bacha (bup lama) ungkup dibacha ba ruai rumah panjai.

Kepala Pengajar Mohamad Mobun madahka taja udah lama tang semua bup nya agi ulih dibacha lebuh maya nadai ngereja pengawa di rumah.

“Ungkup keterubah tu kami ngaga padung bup di ruai ba dua buah rumah panjai iya nya Rumah Panjai Bangkong di ili sekula enggau Rumah Panjai Nawin di seberai sekula.

“Kami ngaga sebuah ruang khas enggau padung endur nusun bup ba ruai awakka semua peranak rumah panjai ulih macha bup baikka nembiak tauka orang tuai,” ku iya lebuh ditanya Suara Sarawak, kemari.

Ku Mohamad, pengawa nyendiaka sebuah ruang khas enggau padung nusun bup tu deka dipejalaika ngagai semua rumah panjai ti dirintaika dalam Program Ruai Based Learning (RBL).

TERIMA KASIH…Bala pengajar benung ngangkut bup ti enda dikena agi nuju Rumah Panjai Bangkong.

“Naka diatu timbal ari apai indai enggau nembiak chukup manah laban siti ari kebuah nembiak enda nemu macha iya nya ketegal nadai bup tauka mar teulihka bup.

“Nya alai, nengah pengawa tu bala nembiak ulih ngelatih diri macha bup di ruai enggau bekunsi penemu nya ngagai apai indai.

“Tu siti ari chara kami nyeridi ulah nembiak di rumah panjai awakka rindu macha laban sida mesti diberi mayuh agi penerang pasal urup, nyepil enggau macha,” ku iya.

Ungkup penerang RBL tu sebuah program belajar enggau ngajar nguna ruai di rumah panjai ungkup nembiak mit enggau orang tuai.

Program tu dipungkal raban pengajar SK Nanga Oyan di Kapit rambau Atur Mindah Betagang (PKP) dipejalaika perintah bekau pengerekai penyakit Covid-19 dua taun ke udah, lalu program agi dipejalaika nyentuk diatu ketegal timbal positif ari apai indai nembiak.

Naka diatu, bisi sepuluh buah rumah panjai ti besemak enggau SK Nanga Oyan nyereta program RBL, iya nya Rumah Weng, Rumah Bangkong, Rumah Nawin, Rumah Lumpun, Rumah Jimmy Jarau, Rumah Darwin, Rumah Nisson enggau Rumah Peter, Rumah Sengiang sereta Rumah Along.

 

Suara Sarawak