KUCHING: Pengawa Ngelancharka Satelit MEASAT-3d Ngundan Kuasa Besai Ungkup Malaysia Timur bulan June tu deka ngemujurka juluk Sarawak nengah Strategi Pemansang Lepas Covid-19 (PCDS) 2030.

Menteri Utiliti enggau Telekomunikasyen, Datuk Julaihi Narawi madah, iya pechayaka inisiatif tu setipak enggau juluk Perintah Sarawak dikena nyungkak ekonomi Sarawak ba timpuh 10 taun.

Ku iya, ekonomi Sarawak ulih ditambah ngagai RM136 bilion ba taun 2019 ngagai RM282 bilion manggai taun 2030 enggau pukul rata ekonomi disungkak 8.0 peratus setaun.

“Nya kebuah dikena nyapai juluk PCDS 2030 nya, takah digital entara komuniti menua pesisir mesti diperati lebuh nyendiaka arus penyambung.

“Ari nya, semua rayat Sarawak deka bisi peluang ke sebaka ngambi bagi dalam sektor ekonomi,” ku Julaihi.

Julaihi mansutka jaku nya lebuh bejadika Pengawa Nasih Tanah Measat 3D HTS East Malaysia Gateway di Reach Ten Teleport Samajaya, ensanus.

Ngelansa silik, iya madahka pintu penama baru satelit nya ulih nyambung ngagai lebih 3,000 taba ungkup sitak menua pesisir di Sarawak.

Pia mega ungkup MEASAT-3d, Julaihi madah tu deka nentuka arus penyambung deras agi ti ngelimat belanja enggau peneras nyentuk 100Mbps.

“Nitihka penerang, satelit baru nya deka nambahka arus penyambung ngambi nempa komuniti inklusif digital enggau nyukung aplikasyen arus penyambung ungkup Revolusyen Industri 4.0 (IR4.0) enggau Internet of Things (loT).

“Inisiatif tu mega ulih dikena dalam bidang baka nyaga pengerai, pekara pelajar enggau ke bukai,” ku iya nerang.
Julaihi ke mega Adun Sebuyau madah, satelit enggau pintu penama baru nya mega ngemujurka inisiatif Perintah Sarawak deka nambahka arus penyambung ke sebaka ungkup rayat.

“Tu seriris enggau tagit kami nentuka 93.6 peratus sitak ba menua tu deka disikap arus telekomunikasyen enggau Internet manggai taun 2025 enggau 99.9 peratus tuai bilik ba mengeri enggau menua pesisir bisi sambung Internet.

“Pia mega, peneras Internet mega ulih ditambah siti ngagai 10 Mbps, 20 ngagai 100 Mbps ba selampur menua,” ku iya nerang.

Ukai semina nya aja ku Julaihi, Perintah Sarawak mega merambu bejalaika transfomasyen digital dikena nyungkak semua sektor ekonomi menua tu.

Julaihi madah baru, tu dikena nambahka produktiviti nentuka peluang sebela ngambi baru ba pemansang menua sereta ngasaika pengeraja diagih sebela nengah peluang kereja enggau dagang.

“Kelimpah nentuka inisiatif infrastruktur komunikasyen fizikal ti diguna rayat, perintah nagit nentuka 100 peratus peranak bulih latih enggau pelajar Sains, Teknologi, Injinir enggau Matematik (Stem) ke ulih nyendiaka kereja begaji besai.

“Pia mega, perintah naka ulih nentuka rayat Sarawak dijaga atur pengelikun siber ke manah agi, nerima perati ke manah agi ari sistem pengatur perintah ke udah ngalih ngagai digital sereta ulih masuk e-dagang mudah agi nengah servis penguna,” ku iya.

Sama datai Sapit Menteri Utiliti enggau Telekomunikasyen (Telekomunikasyen) Datuk Liwan Lagang, Sapit Menteri Utiliti enggau Telekomunikasyen (Utiliti) Datuk Dr. Abdul Rahman Junaidi enggau Sekretari Mendam Opis Menteri, Datuk Alice Jawan Empaling.

BEJADI… Julaihi (tengah) bejadika pengawa nasih tanah Pengawa Ngelancharka Satelit MEASAT-3d Berkapasiti Tinggi ungkup Gerbang Malaysia Timur seraya dikemata bala bukai. – GAMBAR RAMIDI SUBARI.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak