KUCHING: Opis Premier Sarawak deka ngeluarka surat sementara ngagai nembiak baruh umur 21 taun ti nadai ngembuan status peranak menua awakka sida ulih ngulihka akses pelajar enggau perengkaguna pengerai di menua tu.

Menteri Pemansang Orang Indu, Anak Mit Enggau Pengelantang Raban Bansa Datuk Seri Hajah Fatimah Abdullah madahka pekara nya bekau ari isu ti ayan bekaul enggau peminta peranak menua tejanggal ketegal nadai ngembuan dokumen ti sah nguna pekara pelajar enggau pengerai.

“Taja pia, mesti nemu pengeluar surat sementara tu semina ungkup tuju ngemuntangka sida ti nadai status peranak menua ngulihka akses pelajar enggau pengerai di menua tu aja.

“Pekara nya ukai kelai tauka semaya sida dijamin bulih status peranak menua Malaysia ” ku iya.

Iya bejaku munyi nya ba aum media bekaul isu peranak menua di Pustaka Nengeri Sarawak ditu, kemari.

Ku iya, Perintah Sarawak sedar nembiak ti nadai dokumen pengelala diri kelebih agi nembiak mit napi pemar ngulihka pelajar enggau perengkaguna pengerai.

“Akses ngagai dua perengkaguna tu endang hak mensia enggau nadai siku orang ulih ngerampas nya.

“Nya alai, taja pan kuasa meri peranak menua Malaysia tu ba Perintah Besai, Kabinet Nengeri udah ngaga pemutus meri semua bantu di baruh kuasa kitai mantu sida ti enda benasip manah tu,” ku iya.

Iya madahka, pekara tu mega ukai mai reti Perintah Sarawak deka ngelui kuasa besai Perintah Besai dalam atur meri status peranak menua Malaysia di baruh Pekara 15A Konstitusyen Perintah Besai.

Iya nangkan nya andalka Opis Menteri Dalam Menua (KDN) ti ngatur proses meri status peranak menua di menua tu ngelengkaska pekara nya awakka raban nembiak ti napi penanggul tu ulih ngasaika semua pemaik nyadi peranak menua.

Sama bisi datai Sapit Menteri Pemansang Orang Indu, Anak Mit Enggau Pengelantang Raban Bansa ll Mohamad Razi Sitam enggau Direktor Opis Pengelantang Pendiau Noriah Ahmad.

Datuk Seri Hajah Fatimah

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak