KUCHING: Projek Jalai Raya Pan Borneo Sarawak diatu udah nyapai 80 peratus tembu lalu disadang tembu magang renggat keterubah taun 2023.

Menteri Kanan Kereja Raya, Datuk Seri Fadillah Yusof madahka bisi sekeda penanggul ti ngasuh jalai raya nya enda ulih dibuka tauka tembu ujung taun tu.

“Naka diatu lebih 80 peratus udah tembu, kami mega agi melaba ujung taun tu ulih tembu magang.

“Nyema bisi penanggul, sekeda seksyen deka ditembuka ba renggat keterubah taun baru taja pia kami di JKR Sarawak enggau raban kunteriktor agi ngiga jalai awakka projek tu nyapai tagit nitihka taga tembu ujung taun 2022,” ku iya.

Fadillah bejaku munyi nya lebuh ditanya pemberita pengudah bejadika Program Jalinan Kasih Aidilfitri 2022 di Palan Servis N7 Samariang, ditu sehari tu tadi.

Ku iya, entara pekara ti nyadi penanggul ngasuh projek nya laun tembu iya nya enda chukup raban pengereja pengawa, rega barang kunterik ti niki enggau pengurang penatai bekal kuari.

“Taja pan garis entara menua udah dibuka kami agi bedau nerima penama pekereja menua luar, ke alai penyampau mensia ti diguna nembuka projek tu urung 2,000 iku.

“Kelimpah ari nya, barang dikena ngaga projek tu sekeda bisi rega niki kelalu tinggi kelimpah kitai napi penanggul enda chukup bekal baka batu enggau kereban bukai ari kuari,” ku iya.

Berebak enggau nya, iya mwga madahka sekeda pengawa deka diketuka dulu ketegal sukut pengelikun rambau pengerami Hari Raya Aidilfitri sereta ngurangka penyekut jalai alun ti balat jam diatu.

Iya nandu, pengelaju jalai mega dikurangka ari 90 kilometer sejam ngagai 80 kilometer sejam ungkup ngurangka risiko bebadi di jalai alun.

“Kitai deka ngetuka sekeda pengawa ti ulih ngasuh sekut jalai raya nyadi, semina pengawa ti mesti aja ulih dipejalaika sepemanjai timpuh hari raya tu,” ku iya.

Ngelansa program nya kemari, sepenyampau 120 orang kurang penatai pemisi ari Dun Samariang nerima bantu duit hari raya enggau bantu bakul pemakai.

Suara Sarawak