SIBU: Presiden Parti Rakyat Sarawak (PRS), Datuk Joseph Salang Gandum ngelalau komuniti Dayak di Sarawak lebih agi ba sitak Parlimen dipenggi PRS ngemeran semangat beduruk ngambi ulih nyapai pemujur ba Pengawa Bepilih Besai Ke-15 (PRU-15) ke deka datai.

Ku iya, semangat beduruk tu mai reti bebatak ansur ba pengawa politik entara ketuai enggau renggat baruh.

Ex-Kaban Parlimen Julau nya madah, ari peneleba iya pechayaka semangat tu ulih ngelemika sida ti ngemeran politik wang tauka sabotaj dalam parti.

“Enti kitai bekerejasama mantu pangan diri, kitai ulih nyapai pemujur di Julau tang enti sema kitai enda nyukung pangan diri, bisi ke sabotaj baka timpuh aku suba dalam taun 2018, kitai nemu lebuh nya wang enggau bisi sekeda sengaja enda nyukung ngujungka aku alah.

“Tu penyakit ke mayuh nyadi lalu mesti dikeingat, kitai ditulung orang ba Julau, nya kebuah kitai mesti nulung orang bukai ba endur bukai lalu ba endur bukai tu dalam jaku Iban, beduruk… nuan nulung aku, aku nulung nuan,” ku iya.

Salang mansutka jaku nya ngagai pemberita pengudah Pengerami Makai Lemai Aum Besai Pengari Tiga Taun Sekali Kelima Raban Besai PRS di Kingwood Hotel, Hari Minggu tu tadi.

Nyaut tanya pasal pemutus bediri ba Parlimen Julau, Salang madahka penuduk nya dibuka ngagai semua chalun ke patut enggau ditetapka parti ulih bediri.

Tang, iya bisi ati deka mulaika sepuh lebuh alah ba PRU14 ke dulu lalu udah sedia enti dichalunka parti nya baru.

“Bepanggai ngagai orang baruh, enti sema aku pemadu manah dipilih bediri ba Julau, aku deka sedia mega enti sema maya pengawa bepilih aku gerai lalu nadai bepanggul bukai… enti sema aku enda bepengerai baka ni deka bediri.

“Aku mega enggai bediri enti sema bisi penemu madahka aku enda ulih ngempu penuduk nya nibuh ga aku bediri.

“Nya kebuah, ba pekara tu aku nerima aja penemu orang nentuka sekalika aku patut bediri tauka enda,” ku Salang.

Ba PRU14 dalam taun 2018, Salang alah ngelaban chalun Independent lebuh nya, Larry Sng Wei Shien enggau majoriti 1,931 undi lebuh bepadan dua penjuru.

Suara Sarawak