TULUNG ARI KAMI… Tuai Rumah Joshua nerima bantu ari raban DBK ngarika sida serumah

SARATOK: Raban Dayak Bukit Kelingkang (DBK) udah nganjung bantu ngagai peranak Rumah Joshua Sulau, Tanjung Tapang, Awik ditu ti tasah angus empai lama.

Tuai Pampang DBK Betong, Greg Nicholas udah nguluka bala betubuh 30 iku ngena sepuluh buah entukar lebuh nganjung kia kena 4 April tu tadi.

Ku iya, bantu diberi nya datai ari pemeri ti dipupu bala kaban gerempung sida empu ketegal sinuka penusah ti nuntung sida Joshua serumah.

“Udah bala kami nerima berita penusah tu, kami sebuat lalu baum enggau betesau ngagai bala menyadi ba pampang bukai sereta mupu bantu tekala nya.

“Kami mega ngelanggur haribulan enggau jam ti engkeman endur nganjung bantu baka udah dipesetuju semua.

“Puji Tuhan, pengawa mujur dipenyadi sehari tu enggau nadai penanggul,” ku iya lebuh dirandau Suara Sarawak.

Greg madah, sida ngarapka bantu nya ulih ngelempungka tating belanja bala ti karam di darat, abis nadai bala dia chukup pemakai enggau barang diguna.

Entara bantu barang pemakai dianjung sida baka minyak makai, mi, ai irup butul, garam enggau ajinamoto sereta telu kelimpah ari bantu gari.

“Tuju kami deka besaup enggau bala bukai mantu sida tu serumah, udah adat kitai bansa, betulungka bala maya bisi penusah berat baka tu.

“Aku ngarika bala menyadi DBK ari selampur menua ngarapka Tuai Rumah Joshua ulih ngempung enggau mai anembiak redak iya ngepunka idup baru udah tu.

“Utai ke udah nyadi, badu ngenang. Pekara pemadu beguna diatu, liatka ati napi penguji lalu angkat ngaduka pengidup ti meruan agi,” ku Greg nibarka jaku peransang.

Sida sebuat diuluka Tuai Rumah Joshua limpang ngabas gaya rumah ke udah angus seraya ningaka cherita pasal penusah nya ari mulut peranak dia empu.

Ke penerang, 11 pintu bilik Rumah Joshua Sulau, Tanjung Tapang, Awik ditu ke tasah karam di darat urung pukul 11.30 pagi kena 26 March nyin tadi.

Suara Sarawak