Raban soldadu mesti nyaga disiplin

SIMANGGANG: Raban Soldadu 13 Rejimen Askar Melayu Diraja (RAMD) Kem Pakit dipinta semampai ngemeratka disipilin enggau tanggungpengawa diri.

Pekara nya dipansutka Panglima 3 Briged, Brig Jen. Mohd Kamil bin Haji Abdul Latif maya diberi basa bejadika Anjung Perwira 13 RAMD ke baru tembu kilah ensana.

Mohd Kamil mega ngelalau raban soldadu ba kem nya semampai ngemeratka pemanah ulah enggau tanggungpengawa diri.

“Pekara tu chukup beguna dikena nyaga pemanah nama raban soldadu enggau kem tu sekalika maya gawa tauka udah abis jam gawa,” ku lalau Mohd Kamil.

Udah nya, Mohd Kamil minta raban soldadu ba kem nya seruran beserakup sereta ngemeratka pemanah kaul enggau pangan diri enda ngira pangkat diri ngambika nyadi raban ke kering.

Program nya diatur kena ngedutka agi pemanah kaul entara bala pegawai enggau raban soldadu ba kem tu ba baruh pegai 3 Briged.

Pengawa ngatur program tu setipak enggau Tonggak Ketiga Perintah Ulung Panglima Soldadu Darat ke-28 iya nya Pengawa Ngintu Pengelantang Raban Soldadu.

Pengudah Balai Anjung Perwira 13 RAMD nya, Mohd Kamil bisi dibai ngulu Pengawa Bebuka Puasa begulai enggau raban soldadu ba balai raya.

Nangkanka nya mega, raban 13 RAMD Kem Pakit mega bisi ngatur sebengkah Program Bemarin Main Golf begulai enggau Panglima 3 Briged urung pukul 2 lemai ba ‘The Golf Cocoon Pakit GC’ ba kem nya empu.

Penemuai Panglima 3 Briged ngagai kem tu disambut enggau penuh basa ari Pegawai Ke Merintah 13 RAMD, Lt Kol Mohd Rizal bin Mohd Ali begulai enggau raban pegawai soldadu kem tu.

Panglima 3 Briged, Mohd Kamil bin Haji Abdul Latif diberi basa bejadika Balai Anjung Perwira 13 RAMD, Kem Pakit, apin lama ke udah.

Suara Sarawak