Fazzrudin Abdul Rahman

KUCHING: Kaban Kunsil Nengeri (Adun) Tupong, Fazzrudin Abdul Rahman enda entu lantang ati bekaul rega tikit bilun ti mar pulai ari Malaysia Barat ke Sarawak nyerumba Hari Raya Aidiltfitri.

Fazzrudin ti mega Tuai Sekretari Politik ngagai Premier Sarawak madah, rega tikit ti mar tu deka ngenusahka ati peranak menua tu.

“Tu kelebih agi ngagai sida ke lama enda betemu enggau diri sebilik ketegal enda ulih pulai laban pengerekai Covid-19 tu suba.

“Pia mega, pengemar rega tikit bilun tu ulih nating belanja ungkup sida ke baru gawa ba menua Malaysia Barat kelebih agi sida ke baru nirika ruang bilik ti enda nyadi pulai ketegal penanggul tu.

“Lebuh maya ngabas rega tikit ba laman web serikat penerebai bilun, endang amat bisi rega tikit ti ngenyit tinggi taja pan baru masuk seminggu orang bepuasa.

“Reti iya, siku rayat Sarawak deka meli tikit enggau rega dua kali mar ari tambang ngelama tu enti sida deka pulai ke menua maya pengerami,” ku Fazzrudin nengah sebengkah penerang media sehari tu tadi.

Iya mega minta Opis Menteri Pengangkut Malaysia beratika pekara tu lalu ngarapka rega tambang ulih diturunka.

“Aku minta penerebai bilun ngagai Sarawak ditambahka lalu aku arapka serikat ke bekaul tu ulih sinuka bala ke begunaka servis sida iya.

“Enggau penyuah penerebai bilun, dikearapka ulih nurunka rega tikit ambika peranak menua tu ulih pulai.

“Aku minta serikat penerebai bilun ba menua kitai beratika baru rega tikit ti dikeluarka sida iya ti ngemai penanggul ngagai orang ke begunaka servis tu,” ku tandu Sapit Ketuai Nembiak Parti Pesaka Bumiputera Bersatu (PBB) nya.

Ku iya, bisi justikasyen nama kebuah penerebai bilun ari Malaysia Barat enda mayuh kelebih agi diatu pintu sempadan menua udah dibuka baka selama.

Suara Sarawak