KUCHING: Menteri ba Opis Menteri Besai (Parlimen enggau Undang-Undang) Datuk Seri Dr Wan Junaidi Tuanku Jaafar ngaku Kaban Parlimen (MP) nyengkaum kaban perlimen penyakal disadang deka meri kerejasama ti manah dalam ubah Rang Undang-undang (RUU) Mali Merejuk Parti.

Ku iya, mayuh kaban parlimen meri runding tang kepenudi sida mesti meda pekara tu nyadi pekara ngulihka sukung.

“Nyema majoriti setuju enggau siti pekara, kitai mesti nerima meh,” ku iya.

Kaban Parlimen Santubong tu bejaku munyi nya rambau Program Libat Urus Enggau Raban Kurang Penatai Pemisi Parlimen Santubong di sebuah hotel ditu, ensana.

Ku iya, mayuh orang bedau meretika pemar ti ditapi maya ngelangkar RUU nya nengah Parlimen enggau ngulihka runding ari Kaban Parlimen.

Iya madahka, pansik dalam bekaul undang-undang dalam Komiti Dipilih Khas Parlimen baka Gobind Singh Deo (PH-Puchong), Datuk Seri Azalina Othman Said (BN-Pengerang), Datuk Seri Mohamed Nazri Abdul Aziz (BN-Padang Rengas), Datuk Seri Hamzah Zainudin (Bersatu-Larut) enggau Datuk Seri Takiyuddin Hassan (PAS-Kota Bharu) mega bisi diatur.

“Sida tu ngembuan penemu pasal undang-undang ti tegap enggau udah nguna undang-undang ti lama.

“Nya alai, aku pechaya nama pekara ti deka dibantaika bekaul RUU Mali Merejuk Parti tu ila deka ulih diterima rayat Malaysia,” ku iya.

Berebak enggau nya, iya madahka ubah RUU Enda Tau Merejuk Parti ti lebih kompleks enti dibandingka enggau ubah Konstitusyen Sempekat Malaysia 1963 (MA63).

“Kebuah pia, laban kitai nyeliahka atur ngelanggar Pekara 10 di baruh Konstitusyen Perintah Besai.

“Komiti kami mega udah mansik undang-undang bekaul ari menua luar baka England, United Kingdom, India, Singapore, New Zealand enggau Australia,” ku iya.

Iya madahka, proses ngubah RUU tu ukai siti pekara ti muntang laban sida mesti ngemantupka ati mayuh orang ke alai sida deka meri penerang pasal tu enda lama agi.

DATUK SERI DR WAN JUNAIDI  FOTO RAMIDI SUBARI

Suara Sarawak