RWMF diatur chara hibrid 17-19 June 2022

KUCHING: Pengerami Muzik Kampung Ujan Sedunya (RWMF) 2022 deka diatur chara hibrid bepun 17 ngagai 19 June tu berambaika jaku ’25th Legendary Rainforest Celebration’ beserimbai enggau Pengerami Ngintu Taun Ke-25 nya.

Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah madah, tu ari timbal ke chukup manah ari taun nyin tadi, nya kebuah konsep hibrid mengkang dipejalai ngambi ngangkatka RWMF ba tikas dunya.

“Ungkup rikod, RWMF 2021 udah dipeda 402, 865 iku ari 79 menua. Ngarapka taun tu penyampau nya nambah mayuh agi ari bemacham menua dibanding taun nyin tadi,” ku iya nerang.

Karim mansutka jaku nya lebuh bejadika RWMF 2022 di Auditorium Muzium Budaya Borneo, kemari.

Ku iya, konsep konvensional enggau digital ungkup pengerami muzik diangkat nunjukka kitai ngalih ngagai jeman digital sereta ngelaika jubli pirak KWMP taun tu.

“Pengerami taun tu deka nyadi pengerami muzik hibrid entarabansa keterubah di Malaysia pengudah adan menua dibuka baru enggau tuju ngempung baru mensia mayuh,” ku iya.

Karim mega madah, mensia mayuh deka diperindang mayuh artis Sarawak baka Alena Murang, Kemada, Sang Rawi, At Adau, Tuku Kame, Suk Binie’, Nading Rhapsody enggau Mathew Ngau.

“Tambah mega, pemerindang entarabansa ari menua Kanada, India, Amerika Syarikat, Finland, Thailand, Indonesia, Vietnam, Singapore, Jepun, Australia, Mexico, New Zealand, China, Bhutan enggau Korea Selatan mega disadang deka datai,” ku Karim.

Kelimpah pemerindang fizikal, mensia mayuh mega ulih meda pemerindang video, kerejasama ari artis menua enggau entarabansa ke deka dipandang ba panggau enggau skrin nengah online.

Karim meri jamin, pemerindang fizikal nya deka nitihka atur ari Kaunsil Pengelikun Menua (MKN) enggau Komiti Penyangga Penusah Nengeri Sarawak (JPBNS) dikena nyaga pengelikun pengusung ke datai.

Nangkan nya, Tuai Pegawai Eksekutif Kaunsil Dagang Temuai Sarawak (STB), Sharzede Salleh Askor madahka sida naka ulih nentuka KWMF richah agi ari taun ke udah.

“Pemerindang online taun nyin tadi nerima timbal ke chukup manah, nya kebuah bisi edisi hibrid keterubah KWMF.

“Kami ngarapka program tu ulih ngetan sereta ngangkatka baru pesaka muzik ungkup beberapa taun ke deka datai,” ku Sharzede.

Tuai Pegawai Operasyen MASWings, Kapten Nasarudin A Bakar mega meri terima kasih laban dipilih nyadi serikat penerebai rasmi ungkup pemerindang entarabansa ke lama udah dianti nya.

“Kerejasama tu nunjukka pemujur besai entara MAG-STB enggau kededua taban deka chakah agi ngangkatka nama Malaysia sekumbang adan menua dibuka baru lalu Sarawak nyadi palan pematak temuai ti likun ungkup taun 2022.

“Kami pechayaka kerejasama tu beguna amat dikena ngangkatka baru industri dagang temuai, meransang temuai menua enggau entarabansa.

“Kerejasama tu mega dikena nyukung pemain industri baka ejen dagang temuai, pengempu produk, artis menua enggau bakih kunsi,” ku iya nerang silik.

Sama datai Chairman STB Dennis Ngau, Sekretari Mendam Opis Dagang Temuai, Industri Kreatif enggau Seni Pemerindang Sarawak ke mega Sapit Chairman STB, Hii Chang Kee enggau Tuai Pekara Makit Dunya, Malaysia Airlines Waikuan Wong.

Suara Sarawak