KUCHING: Perintah Sarawak deka bisi prerogatif ngemendarka nembiak ke nadai status peranak menua tauak nadai dokumen nurun ke sekula nyema diberi otonomi pelajar.

Adun Ba’Kelalan Baru Bian madah, kuasa nya beguna amat ngambiak nembiak ba nengeri ke nadai bulih akses belajar ketegal bemacham isu lebih agi ngaul status peranak menua lebuh deka nurun ke sekula.

“Nyema diberi otonomi pelajar, Perintah Sarawak deka bisi prerogatif tauka kuasa ngemendarka nembiak ke nadai status peranak menua nurun ke sekula perintah, nyangka bepanggai ngagai sekeda atur bebayar panjar khas,”ku iya.

Iya madah munyi nya nimbal jaku Sapit Menteri ba Opis Premier Sarawak (Undang-Undang, MA63 enggau Kaul Perintah Nengeri-Perintah Besai) Datuk Sharifah Hasidah Sayeed Aman Ghazali bekaul enggau randau entara Perintah Sarawak enggau Perintah Besai pasal MA63, nyengkaum otonomi pelajar ke benung bejalai.

Ku iya, penanggul ke ditapi rayat nengeri tu udah lama lalu status ukai peranak menua nya dekaulih teputar enggau jampat nyema Sarawak ngembiun sekeda hak otonomi ngagai Opis Menteri Dalam Menua (KDN).

“Pia mega tanggungpengawa mansik enggau ngaga pemutus status rayat bepanggai ba rayat kitai empu laban kitai ditu lebih ngelala orang ke sama enggau diau ngelinggi.

“Bebida enggau orang gawa perintah ba Putrajaya ke udah jauh pansut ari penyeranta baka ke ditapi rayat ditu lebih agi raban ke diau ba menua pesisir.

“Sida enda nemu enggau nadai ngasaika diri sinu nyentuk nadai berumban mutarka isu peranak menua ke ditapi rayat Sarawak,” ku iya.

Iya mega madah, randau enggau Perintah Besai mega enda patut kelalu lama enggau nadai sebarang pemutus laban rayat deka meda pekara nya teputar lengkas.

“Tu betuju ngambika nembiak ke nadai dokumen enda ibuh nganti kelalu lama endur nurun ke sekula sereta nyeliahka sida kelalu tinggal pelajar,” ku iya.

Udah nya, iya madah diri udah merambu sebedau tu ngambika empat opis menteri tauka sebagi ari tanggungpengawa opis menteri tu diberi ngagai Sarawak, baka elajar, pengerai, infrastruktur enggau di baruh Opis Menteri Kereja Raya, sereta sebagi ari KDN.

Nengah pengawa meri nya, ku iya Sarawak mega deka ulih ngaga pemutus pasal pelajar diri empu, polisi enggau mega program infrastruktur baka infrastruktur jalai raya ke jauh tinggal ari Semenanjung.

Iya mega ngansak Perintah Sarawak lurus agi bekunsi asil randau enggau pekara ke bekaul MA63 laban rayat mega deka nemu pemutus randau nya.

BARU BIAN

Suara Sarawak