KENA NGADUKA PEMANSANG: Ali nyuaka chek ngagai Alexander seraya dikemata bala bukai.

SARATOK: Kaban Parlimen Saratok, Datuk Ali Biju merambu ngagai kaban Gerempung Bansa Dayak Sarawak (SDNU) Saratok ngatur program ekonomi ba Rumah Dayak ditu.

Ku iya, kitai ulih ngempung enggau ngempuruka rayat ba siti palan ti ulih ngedutka tanggam kaul begulai sereta meri sukung ngagai pengawa ekonomi tauka dagang dipejalai dia.

“Kitai bechuanka pemujur bala ti bedagang ba program Uptown Saratok di padang dia ti udah nyungkak ekonomi sida.

“Nyadi aku udah ngerandau Chairman SDNU Saratok, Alexander Sela ngambi ngiga runding ni bagi utai ulih dijual enggau bala ti deka bejual dia.

“Aku mega udah ngasuh bala sida nyendiaka langkau daja ti disikap api ba mua pelaman Rumah Dayak ditu.

“Tu kena kitai ngerami, begelumu maya lemai hari, ari ke nadai pengawa diau di rumah, manah agi kitai datai kitu, nyukung dagang sereta ngerichahka agi Rumah Dayak kitai,” ku iya.

Sapit Menteri Pengeluar Kuasa enggau Pengeraja Asal nya mansutka jaku nya lebuh dipebasa bejaku bejadika Pengerami Makai Lemai Tamat Ngajat Indu enggau Lelaki sereta Kuntau ba Dewan Rumah Dayak, Saratok ditu, empai lama.

Ali madah, kitai betah duduk ba Rumah Dayak laban nyau richah, mayuh orang bejual, seraya berandau betunga enggau bala kaban, nanya rita enggau becherita pasal pengawa diri.

“Awakka kitai ditemu orang begempung, selubang penemu enggau ulih segulai sejalai sereta begulai bebaik enggau pangan diri.

“Lalu program tu deka dikemujur enda lama agi, nyerumba Bazaar Gawai Dayak kitai ti deka datai.

“Nya alai aku minta enggau meransang semua kitai ditu bela besukungka pengawa ngambi dipeda rami enggau seati lalu pemaik pulai ngagai kitai empu,” ku jaku peransang iya.

Kelai sukung ngagai pemansang komuniti Dayak di menua nya, Ali udah ngagihka RM25,000 ngagai SDNU Saratok seraya Serakup Indu Dayak Sarawak (SIDS) Saratok ampit RM10,000.

Suara Sarawak