SARATOK: Sepenyampau semilan Projek Jalai Kebun udah dikemendarka Perintah Besai nengah Opis Menteri Pemansang Menua Pesisir (KPLB) ungkup sitak Parlimen Saratok.

Sapit Menteri Pengeluar Kuasa enggau Pengeraja Asal, Datuk Ali Biju madah, kesemua semilan projek ungkup pemansang pengawa betanam betupi nya deka dirumban.

Ku iya, pejalai tinda projek mega udah tembu ke alai Opis Betanam Betupi Sarawak udah dichiri enggau dilempaika tanggungpengawa nyadi ejensi bejalaika projek nya.

“Projek tu ila mungkur pengawa ngaga baru, nyeleti enggau ngemanahka jalai kebun ke bisi diatu ngambi bala pekebun muntang bejalaika pengawa sida sereta ulih ditengah entukar ti ngangkut asil kebun.

“Jalai tu mega deka nyadi jalai penyambung ba genturung pendiau baka rumah panjai enggau rumah nyembuah sereta kebun mit ti kena pansa ngagai jalai besai,” ku iya ba sebengkah penerang berita tadi.

Ali ke mega Kaban Parlimen Saratok andalka projek nya meri empas besai ba pemansang ekonomi rama rayat menuan pesisir laban nyau bisi jalai penyambung ti meruan agi.

Iya madah baru, pengawa ngaul ekonomi baka bekebun enggau tikas pemanah idup rayat di menua nya mega ulih disungkak kelimpah jalai nya endang beguna endar kelebih agi bala pekebun mit.

Berita penuh Ruai 6 pagila

Suara Sarawak