BINTULU: ‘Asaika lepas ari nyawa baya’ nyangka baka nya ku sempama jaku ti ulih ngambarka pengasai ati ditapi tudah siku indu peranak menua Bintulu ke mujur dibantu pulai ke menua asal diri pengudah ditipu ejen gawa ari menua luar.

Nitihka penerang Kaban Kunsil Nengeri (Adun) Dudong, Datuk Seri Tiong King Sing mujur mantu indu nya ari terus ditipu ejen ti bedagangka mensia di Thailand pengudah indu nya nguji minta pengawa ba menua luar.

Tiong ke mega Kaban Parlimen Bintulu madah, indu nya mujur dibai pulai ke Kuala Lumpur kena Hari Empat tu tadi lalu deka dibai pulai ke Bintulu enda lama agi.

“Bisi siku indu ari sitak parlimen aku (Bintulu) udah kena tipu sindiket ti mantaika gaji besai di menua luar.

“Indu nya deka mantu nyungkak penatai pemisi sida sebilik taja pia enda mujur nyapai juluk ati nya lebuh iya tepejuh dibai sindiket ti bejalaika aktiviti bedagangka mensia.

“Pun iya, indu nya nyangka deka bulih pengawa di Kuala Lumpur enggau gaji ti besai, tang pekara diperagam iya nya enda amai laban indu tu dikemula seraban orang ti madahka iya dibai gawa ba Thailand.

“Udah niki bilun, baru indu tu nemu diri dibai tama ba bilun ti terengkah ba menua Laos,” ku iya dalam penerang di Facebook Parti Demokratik Progresif (PDP) ensana.

Terang Tiong, pengudah diau ba Laos sepengelama bebulan, raban orang nya merambu deka ngena jalai chit neruska pengawa enda menuku nya.

Pia mega, ku iya, indu nya udah dibai belalai ke Thailand ke alai palan kepenydi iya dibai ke menua Myanmar.

“Nasip indu tu manah laban sepengelama diau ba Thailand, iya mujur mupuk begadai-gadai ngelarika diri ngulihka bantu.

“Pekara nya udah tentu nyadi kenang pait ti enda ulih dibuai indu nya.

“Ruang bilik indu nya mega udah minta bantu ari aku lalu aku udah ngusung Thailand pagi siti.

“Nangkan nya, aku meri terima kasih ngagai Duta Malaysia di Thailand, Opis Imigresen, raban soldadu enggau polis din laban udah mujur mantu indu tu,” ku iya.

Iya mega meri terima kasih ngagai raban bekuasa Malaysia enggau Thailand atas kaul komunikasyen ti chakah maya operasyen tu.

Tandu iya, penyikar sida, asil randau enggau proses mantu indu nya udah mai pemujur.

“Aku ngarapka pekara baka tu ulih muka runding rayat Malaysia ‘ukai muntang deka senang’. Kitai nemu diatu semua orang benung negapka baru ekonomi sida, tang kitai patut pintar mida utai ti manah enggau enda manah.

“Anang muntang kena panjuk iklan pengawa puang enggau gaji besai di menua luar, laban nya entara chara orang nipu kitai,” ku iya.

Iya mega ngelalau orang ti benung ngiga pengawa begaji besai nemu chara ti betu minta pengawa din.

Ku iya, rayat patut mansik dulu serikat ti meri pengawa, lalu anang begadaika nyawa diri empu.

“Anang ngaga pemutus ti tau ngasuh nuan nesal dalam pengidup. Pia mega, ukai semua orang benasip baka indu ulih keluar ari nyawa rimau.

“Tentu mayuh agi orang b luar din ti benung diguna raban orang ti enda mereti, kitai enda nemu,” ku iya.

TERIMA KASIH YB…Datuk Seri Tiong King Sing (tengah) mujur mantu tudah siku indu ari Bintulu ari terus kena tipu bejalaika pengawa enda menuku di Thailand. -Gambar FB Dato Tiong King Sing

Suara Sarawak