MUJUR DITANGKAP…Siku ular sawa empat kaki pemanjai mujur ditangkap ba dalam mangkuk agu sebuah rumah di Taman Semumok, Betong.

BETONG: Siku ular sawa empat kaki pemanjai belalai dalam mangkuk agu ba sebuah rumah di Taman Semumok mujur ditangkap.

Bilik Ngatur Operasyen Penyaga Orang Periman (APM) Betong madahka sida nerima kangau telefon ari siku orang periman ke benama Kamel bin Sitam urung pukul 10 pagi kemari bekaul enggau penusah nya.

Penerang ari Komander Operasyen nangkap ular sawa, Sjn (PA) Roslan bin Jamel madahka operasyen tu bela disempulang dua iku raban APM Betong ari Tim Bravo iya nya L/Kpl (PA) Hilton anak Ane enggau L/Kpl (PA) Ivan anak Benedict.

“Lebuh raban kami datai ba palan penusah nya urung pukul 10.10 pagi endang amat bisi siku ular sawa bansa batik benung belalai dalam mangkuk agu rumah orang nya,” kenu ku padah Roslan.

Ku padah iya mega, ular sawa empat kaki pemanjai tu mujur ditangkap raban sida ngena chara panjuk lalu dilepaska ba babas enda jauh ari endur nya.

“Operasyen nangkap ular tu diketuka urung pukul 10.15 pagi lalu nadai orang diripotka bebadi tauka bakal ba batang tubuh berebak ari penusah tu,” ku tusui Roslan.

Suara Sarawak