KUCHING: Mensia mayuh mesti seruran beratika sindrom enda ingat, telunga enggau ilap (3L) nyerumba pengerami ke deka datai, ku Direktor Opis Bomba enggau Penyah Penusah Malaysia Datuk Khirudin Drahman.

Ku iya, nitihka pansik kes ti nambah apin lama, tebal agi penusah angus nyadi ketegal sindrom 3L tauka pemadu baru ketegal mungkal ditunu.

“Nya kebuah, mensia mayuh dipinta seruran bejejaga lebih agi lebuh ngena dapur enggau kereban elektrik.

“Kereban elektrik mesti dipejalai enggau betul sereta likun. Pia mega, peresa tali karan lama ke tau ngujungka sut tali karan laban enti kelalu angat tau nyadi pun penusah angus,” ku iya nerang.

Khirudin madah nyemetak, mensia mayuh mesti matau enggau nyeliahka penusah tu ungkup pengelikun semua.

Nambahka nya ku iya, mensia mayuh mega mesti sedia enggau ngembuan penemu sikar ngerara penusah angus.

Ku iya, pengawa ngerara penusah angus ba timpuh lima minit keterubah laban nya deka nentuka api ulih dirara tauka enda.

Nya kebuah, iya mesan mensia mayuh mesti bisi abis nadai siti kereban pengerara api ba tiap rumah dikena madamka penusah angus enggau jampat.

“Alat pengesan asap mega ulih dipasang laban ulih ulih bebunyi maya penusah angus nyadi maya orang benung jenak tinduk maya malam tauka tumu pagi,” ku iya nerang.

Iya mega madah,pengawa ke betul mesti dipejalai dikena nyeliahka penusah ke enda disadang nyadi.

“Anang tepekul enggau retung ba penusah angus ketegal ulah kitai empu,” ku iya.

BEGUNA… Khirudin nunjukka kereban pengelikun ke patut bisi dalam rumah.

Suara Sarawak