KUCHING: Polis DiRaja Malaysia (PDRM) Kontinjen Sarawak neruska pengawa matau nitihka Atur Pengawa Standard (SOP) lebuh menua ngalih ngagai endemik.

Pemangku Kepala Polis Sarawak DCP Datuk Mancha Ata madah, taja nadai SOP ke silik bekaul menua ngalih ngagai endemik tang sida deka neruska pengawa matau baka selama.

“Kami apin nerima SOP bekaul endemik, pengudah nerima SOP ke baru nya kami deka ngaga perambu bukai.

“Taja pia diatu pengawa matau SOP maya pandemik suba agi ditampung,” ku Mancha.

Mancha mansutka jaku nya ngagai pemberita pengudah bejadika Program Kayuhan Kebajikan 215 KM beserimbai enggau Pengawa Ngingatka Hari Polis ke-215 di IPD Kuching, kemari.

Dulu ari nya, Menteri Besai Datuk Seri Ismail Sabri Yaakob ba pun bulan March tu tadi madahka menua ngalih ngagai endemik bepun 1 April tu tadi.

Ku iya, renggat nya nentuka menua pulai ngagai pengidup asal pengudah rayat napi penusah ketegal pandemik Covid-19 ti ngerekai ba menua tu kenyau ari dua taun ke udah.

Ku iya, renggat nya sementara aja sebedau menua ngalih ngagai endemik nitihka penerang dibantaika Serakup Pengerai Dunya (WHO).

Mensia mayuh agi bekenaka sengkabung mua baka selama tang jam kedai buka ke ditetapka sebedau tu udah dipadam.

ENGGI NUAN… Mancha (dua kiba) nerima tepa ari Tuai Polis Pelilih Kuching, Asisten Komisioner Ahsmon Bajah (dua kanan) seraya dikemata Tuai Opis Pansik Penyalah Senior Asisten Komisioner Lukas Aket.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak