MIRI: Kelimpah ngena kayu tebelian, bemacham pekara mesti diperunding ngujungka ungkus ngaga jelatung Kampung Mutap, Bekenu manggai RM50,000.

Opis Kereja Raya (JKR) Bagi Menua Miri madah, entara pekara ti diperunding iya nya gaya jalai kebun nuju Kampung Mutap, perengka pengangkut sereta pengelikun laban sitak nya mayuh baya.

Pia mega, kayu tebelian ke dikena nya berega RM9,000 semeter kiub, mudah agi agi rega pasar.

“Ngena bajet RM50,000, JKR Sarawak mujur ngaga jelatung sepemanjai 15 meter nya,” ku penerang nya.

Ku penerang nya, jaku dibantaika mensia mayuh ba media rama pasal ungkus RM50,000 dikena ngaga jelatung nya enda patut.

Ngelansa silik pasal projek nya, JKR Bagi Menua Miri madah, terubah suba projek ngaga jelatung nya diperambu ngena besi tang ketegal begunaka besai belanja ngujungka Tuai Kampung Mutap, Sedia Abdullah nulak perambu nya lalu ngasuh ngena tebelian.

Nya kebuah laban ke suntuk belanja, Tuai Genturung Pendiau mesti minta belanja tambah ari pengari rayat sida dikena bejalaika projek renggat kedua ngaga jelatung nya.

“Lebuh ngabas taba jelatung nya, Tuai Genturung Pendiau madahka sungai nya mayuh baya lalu kunteriktor ti dichiri mesti bejejaga lebuh bejalaika projek nya nitihka timpuh ke patut.

“Pekara bukai dikeirau nya jalai nuju Kampung Mutap laban jalai kebun nya pedis ditengah,” ku penerang nya.
.

JKR Bagi Menua Miri mega madah, pengawa chabut undi ungkup projek nya dipejalai kena 30 November 2021 di Opis Residen Miri enggau kunteriktor ti dipilih nya Serikat Bukit Balat.

Ku penerang nya, kunterik nya udah diberi lalu berengkah dipejalai kena 7 March tu tadi lalu dipelaba tembu kena 6 June tu.

“Projek jelatung nya mujur ditembu kena 6 April tu tadi lalu pengawa meresa taba nya udah dipejalai JKR Bagi Menua Miri begulai enggau Tuai Genturung Pendiau enggau Kunteriktor.

“Projek dipejalai kunteriktor nya mega ngemantupka ati lalu nya kebuah, udah nya jelatung kayu tebelian nya diserah ngagai tuai genturung pendiau nya,” ku penerang nya.

UDAH TEMBU… Jelatung Kampung Mutap udah tembu nya beungkus RM50,000 lalu bala penguna ba media rama madahka ungkus nya enda patut.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak