Talukka pengarap, titihka pengidup Kristus

KUCHING: Raban orang Kristian patut meretika penguji ti datai lalu seruran bepegai teguh ba pengarap sida.

Kaban Parlimen Selangau, Baru Bian madah, penguji besai ba jeman pandemik, gelumbang politik, ekonomi kusut enggau pekara rama enda menuku ti diasaika kitai diatu patut diambika teladan enggau lalau.

Ku iya, semina penegap ba pengarap ngagai Tuhan aja ulih nyadika pengering runding enggau pemintar akal kitai ngambi ulih nempuh semua penguji nya lalu teulihka pengidup menyana.

“Nyadi raban orang Kristian, kitai anang empelita ba utai ti benung nyadi ba menua kitai diatu baka penanggul enggau penguji ba politik, ekonomi enggau pekara rama.

“Pia mega penangi enggau pengirau komuniti entarabansa ba penyarut ti nyadi di menua Ukraine din ti apin teputar nyentuk diatu.

“Maya menua benung sigau, dikeruga pandemik ti lalu enda pukas, sereta bemacham penusah besai bukai, kitai enda ulih meleka ari arapka Tuhan lalu pengawa ti patut, nyadi Pengasuh Kristus.

“Lalu siti utai ti beguna amat diatu, kitai bekunsika pengandal enggau pengarap ke alai menua deka suman, bemalinka Jaku Injil, barang sapa arapka Iya, taja Iya udah parai tang deka angkat idup baru.

“Baka tu mih chuan pengidup ditunda kitai, deka angkat baru laban kitai bisi pengandal, kitai talukka pengarap lalu nitihka pengidup Kristus,” ku iya.

Baru ke mega Adun Be’Kalalan nibarka jaku nya ba pesan Hari Easter 2022 ari iya nyerumba hari besai raban orang Kristian ti diintu sehari tu.

Iya madah, pengandal kitai ba hari besai Easter nya pengandal besai kitai ngagai perintah Tuhan lalu ngasika jaku ajar Iya ngambi idup kitai serekun sereta kuru ari sebarang penusah.

“Easter tu awak kitai belematika ulah diri, beratika baru pengarap enggau ngepunka pengidup ti baru, ti meruan agi.

“Kitai mesti gaga ati nerima pemeri besai ari pemarai enggau pengangkat Jesus ari pemarai. Baka nya pengandal ke menua kitai, politik enggau ekonomi deka suman, pulai manah,” ku Baru nyimpul jaku iya.

Suara Sarawak