MIRI: Radio Televisyen Malaysia (RTM) bejalaika tanggungpengawa ke besai dalam mantu perintah ngenataika agenda pemansang ngagai raban ke diselinting.

Menteri Perengka Pengangkut Sarawak Datuk Sri Lee Kim Shin madah, RTM endang pelasar berandau pemadu manah nyadi speaker perintah, nengah bemacham program ke disedia ungkup komuniti.

“Dalam timpuh 76 taun, pemungkal dunya broadcasting menua tu mujur bejalaika tanggungpengawa, pia mega RTM terus rindu dipeda seriris enggau pemansang teknologi broadcasting ke majak ngerembai.

RTM udah mantaika bemacham berita enggau sejarah menua, enggau nengeri baka penyadi Sarawak merdeka enggau penumbuh Malaysia ke mengkang ditaruh RTM nyadi pesaka menua,” ku iya.

Kim Shin ke mega Adun Senadin madah munyi nya nyerumba Pengerami Ngintu Taun Hari RTM Ke-76 ditu, kemari.

Ku iya, nengah tanggungpengawa RTM ke terus relevan dalam mantu ngenataika penerang enggau agenda perintah ngagai rayat, nyadi endang nyadi pengandal raban broadcasting stesyen tu nambahka penemu enggau pengelandik seriris enggau pemansang teknologi kemaya hari (baru).

“Program pemadu manah ungkup semua renggat umur patut digaga mayuh seriris enggau pemansang diatu,” ku iya.
Pia mega, siti agi pemanah RTM iya ngagai industri kreatif laban meri awak ngadaka raban orang baru tauka raban artis biak ke bepenau di nengeri tu.

“Aku sigi nyukung pengawa RTM dalam ngatur peluang dikena ngadaka rebak baru ke bepenau lalu ngatur program ke bisi pemaik ngagai rayat,” ku iya.

RTM mega ku iya suah mantaika penerang ningkal berita bula ngambika komuniti enda tepawir enggau agenda sekeda raban tke bejai perintah.

“Aku ngarapka RTM terus meri penerang pasal polisi enggau kuing tuju perintah, laban agi mayuh sitak ba nengeri tu napi penanggul arus internet,” ku iya.

RTM endang stesyen broadcasting perintah ti muka sekeda stesyen radio enggau televisyen.

Penerang ari radio RTM berengkah kena 1 April 1946, udah nya berengkah dipandang cherita televisyen kena 28 Disember 1963.

Seninjin enggau rambai jaku RTM ‘Teman Setia Anda’, RTM udah 76 taun nyadi sada penyambung entara perintah enggau rayat, nengah enam stesyen TV (iya nya TV1, TV2, TV Okey, Berita, Sukan enggau TV6) enggau mega 34 stesyen radio endang deka terus diguna dalam ngenataika penerang pemadu baru ngagai rayat Malaysia.
Sama datai Menijar Stesyen RTM Miri Lydia Paya Rinyud.

TAUN KE-76…..Kim Shin enggau Lydia sereta staf RTM Miri ngerami Pengerami Ngintu Taun Hari RTM Ke-76 ditu, kemari.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak