SIBU: Kaban Kunsil Nengeri (Adun) Dudong Datuk Seri Tiong King Sing dekaka siku Pemancha raban bansa Iban dichiri ba sitak dipegai iya.

Ku iya, kuota Pemancha ke bisi diatu diungkup ngagai sitak Dun Bawang Assan lalu sama mega kuota Temenggong.

“Pemancha enggau Temenggong bela udah bisi di Bawang Assan.

“Nya kebuah, aku dekaka Pemancha ditarit ngagai Dudong seraya Temenggong mengkang di Bawang Assan,” ku Tiong madah nyemetak.

Ku iya, enti kededua kuota nya meruan diungkupka ba sitak ke sama, pedis rayat ngiga kededua tuai komuniti nya.

“Enti Pemancha bisi ba Dudong enggau Temenggong bisi ba Bawang Assan, muntang agi ga rayat ngiga lebuh begunaka sida.

“Enti kededua nya bela di Bawang Assan, pedis rayat ngiga sida laban bela ba endur ke sama.

“Enti siku ari sida ba endur bukai muntang agi. Enti ngasaika Temenggong jauh, rayat ulih ngiga Pemancha,” ku Kaban Parlimen Bintulu nya.

Tiong mansutka jaku nya lebuh ngemataka Pengawa Nyuaka Surat Dichiri ngagai 33 Tuai Komuniti enggau Tuai Raban Bansa (KMKK) sitak Dun Dudong, kemari.

DICHIRI… Hee Sieng (kiba) nyuaka surat dichiri ngagai siku ari KMKK seraya dikemata Tiong (dua kiba), Ching Yong (dua kanan) enggau Lau.

Suara Sarawak