KANOWIT: Kaban Kunsil Nengeri (Adun) Ngemah, Anyi Jana ngelalau tuai rumah ke udah dipadu mangku pengawa ba sitak tu anang kelalu jauh bejalai sereta lama ninggalka rumah panjai diri.

Ku Anyi, tu kelebih agi ngagai sida ke udah nerima setipikit nyadi tuai rumah patut meri servis ke meruan enggau nyaga nembiak redak diri enggau manah.

Berebak enggau nya mega, Anyi meri penerang bekaul enggau chara ngaga kad pengelala sereta surat beranak ungkup rayat ke bedau ngembuan dokumen ke bakatu.

Ba jaku iya mega, Anyi bisi meri penerang bekaul projek baka Projek Transformasyen Menua Pesisir (RTP), Projek Mit Pemansang Menua Pesisir (MRP), projek ari Opis Pemansang Nengeri (SDO), Program Nyeleti Rumah Seranta Sarawak (PPRMS) enggau mega bakani chara ngaga peminta projek tu.

Anyi mantaika jaku penerang tu ba sebengkah Program Komuniti Sejahtera ti diatur Kemas Kanowit ba Rumah Taboh Nanga Ngungun, apin lama ke udah.

“Meri jaku puji ngagai Kemas Kanowit laban udah mujur ngatur program ti chukup manah ungkup peranak sitak Ngemah.

“Aku ngarapka program ke baka tu ulih digaga baru ba jemah ila enggau lalau ngarapka mayuh agi aktiviti ke bukai deka ditambah,” ku Anyi.

Ba program tu mega, Anyi begulai enggau Gerempung Pengelikun Rama (Perkeso) Sibu udah nyuaka pemeri ngagai waris niang Lugom Ranji.

Sama bisi datai ba program tu iya nya bini Anyi, Gelim Utan, Pegawai Kemas Kanowit Siti Ja’auyah, Supervisor Ukas Bagi Menua Sibu Jelani Ajang, pengari IPD Kanowit Inspektor Ardian Sha, Ketuai Penguatkuasa Perkeso Sibu Slyvester Candy Pai, Penghulu Ron Ugai, Penghulu Ugap Seribu, Sapit Chairman PRS Ngemah Kaunselor Cliff Unting, Komiti Indu PRS Ngemah Kaunselor Mutang Kerani enggau Ketuai Nembiak PRS Ngemah Stenny Willis.

JAKU LALAU…Anyi lebuh bejaku nutup program ke diatur Rumah Taboh Nanga Ngungun, apin lama ke udah.

Suara Sarawak