PENGAWA betanamka sayur bisi pengulih dikena nambahka penatai pemisi lebih agi ba menua pesisir laban sayur diatu chukup berega.

Sereni Mutek asal ari Rumah Emak, Sungai Sut, Kapit madahka diri endang lama udah betanam enggau nyual sayur laban sayur chukup berega di Kapit.

“Aku entara kami serumah ke lama udah ngereja pengawa betanamka sayur kibung laban sayur diatu chukup berega enggau laku.

“Nya kebuah, pengawa betanamka sayur tu entara chara dikena nambahka penatai pemisi kami sebilik.

“Tambah mega, sayur dijual aku chukup laku. Semua sayur ke ditanam aku dijual berega RM2 seikat,” ku Sereni.

Nambahka nya, Sereni madah, entara sayur ke ditanam baka sawi gadung, sawi manis (lobak manis) enggau sawi geletang (lobak salad).

BISI PENGULIH… Sereni benung ngambi sayur ari kebun iya ngambi dijual ba makit Teresang, Kapit.

DAGANG LAKU

Sereni madah, iya deka berengkah nyual sayur sebulan pengudah sayur nya tumbuh galak.

Iya mega madahka sida serumah suah bejualka sayur ditanam nya ba Makit Teresang, Kapit.

“Kelimpah ari nya, kami mega bisi nyendiaka servis ngudar dulu lalu aku deka nganjung semua sayur nya ngagai Makit Teresang.

“Naka diatu, aku semina nyual sayur tu semak rumah panjai enggau di makit Teresang aja lalu sida mega tau ngudar ungkup hari siti.

“Belebuh bisi ga orang ari rumah bukai datai ke rumah panjai kami meli sayur aku enggau bala bukai.

“Untung ari pengawa betanam enggau nyual sayur tu enda tetap laban enti mayuh agi sayur dibeli orang, mayuh agi ga untung.

“Nya kebuah, penguntung aku bejualka sayur tu kira RM500 ngagai RM1,000,” ku Sereni seraya madahka pengawa betanam enggau bejualka sayur tu endang patut dikereja bala bukai dikena nambahka belanja.

Berita penuh ba Ruai 1 pagila

Suara Sarawak