KUCHING: Opis Bomba enggau Penyah Penusah Malaysia (JBPM) merambu nirika 17 balai bomba baru enggau 10 kereban dikena negapka penau sida dudi hari.

Tuai Direktor iya, Datuk Seri Mohammad Hamdan Wahid madah, peminta nirika balai enggau nambahka kereban nya udah dibantai ngagai perintah dikena nukar kereban ke udah lama.

“Kereban baru tu dikena nukar kereban ke enda ulih dibiki kelimpah dikena nambahka kereban ke bisi diatu.

“Kami mega minta teknologi baru seikas enggau sekeda servis bomba ke maju agi ba dunya tu nengah pemansang enggau teknologi ke bisi dalam menua,” ku iya.

Mohammad Hamdan mansutka jaku nya lebuh ngatur pejalai ngabang raya Tuai Direktor ke Balai Bomba Padungan, kemari.

Ku iya, pekara tu beguna amat nipakka tikas pengelikun ke majak nambah di menua tu.

Ku iya, tu mega nipakka pansik ba taun 2015 enggau 2022 bekaul ‘fire cover norm’ ti dikelala ba sekeda tumpuk buta ke mesti ditumbuh palan bomba ba selampur Malaysia.

“Kami beratika pemesai guna balai bomba ba endur nya ngambi nyendiaka servis ngagai komuniti lalu servis nyapai tuju nitihka Tikas Penyulut Pengawa (KPI) ke udah ditetap.

“Pia mega, palan operasyen endur bilun engkabang sangkai mega beguna nentuka operasyen lanchar dipejalai,” ku Mohammad Hamdan.

Nambahka nya, sida mega beratika guna sistem pintar dikena matau enggau nagang penusah ngenyit ba selampur menua seikas enggau menua mansang.

Ku iya, semua peminta udah dibantai di baruh Langgur Pemansang Malaysia Lumpar Ke-12 (RMK-12).

Datuk Seri Mohammad Hamdan Wahid

Suara Sarawak