KUCHING: Datuk Patinggi Tan Sri Abang Johari Tun Openg enggai meri awak ngagai chalun Parti Pribumi Bersatu Malaysia (Bersatu) dikena nambahka penuduk Gempung Parti Sarawak (GPS) ba Pengawa Bepilih Besai (PRU) ke deka datai.

Tang, Premier Sarawak ke mega Chairman GPS nya nyemetak madahka semina chalun ari parti komponen GPS aja deka bediri ba 31 penuduk nya.

“Aku udah madah, kami deka ngisi (bediri minta pilih) ba semua 31 penuduk (Parlimen) nya,” ku iya.

Abang Johari mansutka jaku nya beserimbai enggau Pengerami Aidilfitri Dun Gedong begulai enggau Premier Sarawak ke mega Adun Gedong di sebuah hotel, ensanus.

Naka diatu, bisi dua Kaban Parlimen ari Sarawak ti masuk Bersatu lalu netapka diri bebakih enggau GPS.

Sida tu iya nya Kaban Parlimen Puncak Borneo ke mega Sapit Menteri Pengawa Bekebun enggau Komoditi, Datuk Willie Mongin enggau Kaban Parlimen Saratok ke mega Sapit Menteri Pengeluar Kuasa enggau Pengeraja Asal, Datuk Ali Biju.

Kededua nya ex-tuai Parti Keadilan Rakyat (PKR) tang ngembuan sukut tegut ba sitak sida.

Nya kebuah, Abang Johari ngelalau rayat Sarawak ngembuan siti sada nentuka GPS menang ba PRU ke disadang diatur enda lama agi.

Ku iya, ari nya aja sada Sarawak deka tampak agi didinga ba renggat Perintah Besai lebih agi nagih semua hak nitihka Konstitusyen Malaysia, Sempekat Malaysia 1963 (MA63) enggau Ripot Komiti Entara Perintah (IGC).

“Kami enggai lebih enggau enggai mega kurang ari utai ke patut, kami semina dekaka pekara ke bisi dipasuk dalam Konstitusyen Malaysia, MA63 enggau IGC aja lalu Sarawak deka bejalaika pengawa negapka Malaysia.

“Nya kebuah kami nadai niat belaban tang niat kami deka negapka menua Sarawak,” ku iya.

Ku Abang Johari, Sarawak bisi pemansang besai enggau penegap deka nambah nengah chara baru ke dibai iya begulai enggau tuai GPS bukai.

Nambahka nya ku iya, Perintah Sarawak mega deka ngubah undang-undang menu aba Aum Dun bulan tu ke deka negapka agi hak Sarawak ekonomi baru.

“Undang-undang tu deka negapka Perintah Sarawak,” ku Abang Johari nerang.

Suara Sarawak