KUCHING: Bisi 567 ladang sawit udah diperesa Opis Pengereja Pengawa bepun bulan Januari nyentuk April tu tadi dikena mutarka isu pengereja nadai permit di Sarawak.

Sapit Menteri ba Opis Premier Sarawak (Pengereja Pengawa, Imigresyen enggau Matau Projek), Datuk Gerawat Gala madah, pengawa meresa nya entara inisiatif lalu dipejalai ba ladang di menua ulu.

“Ba taun 2021, bisi 712 ladang udah diperesa dikena mutarka isu pengereja nadai permit ke gawa di ladang sawit ba menua tu,” ku Gerawat.

Gerawat mansutka jaku nya lebuh nyaut tanya Adun Balingian Abdul Yakub Arbi sentang isu penatai pengereja nadai permit ba lawing sawit lebuh Aum Penggal Keterubah Dun Ke-19 Sarawak, ensanus.

Nambahka nya ku iya, perintah Sarawak mega bejalaika inisiatif bukai nentuka pekara nya ulih ditagang.

Ku iya, perintah udah bejalaika Program Ngambi Pengereja Pengawa (RTK) enggau Rekalibrasi Dianjung Pulai (RP) di Sarawak ngaul Opis Imigresyen Malaysia Sarawak enggau Opis Pengereja Pengawa nengah Pelin Rekalibrasi Peranak Menua Luar Nadai Pemendar (Pati).

“Program RTK netapka Pati nyadi pengereja menua luar ti sah digaji pengaji nitihka atur ke udah ditetap.

“Di baruh program tu, sepenyampau 1,479 Pati udah direjister di baruh sektor ladang lalu nya sektor besai ngaul dalam Program Ngambi Pengereja Pengawa.

“Nengah program RP, bisi 635 Pati udah dianjung pulai ke menua asal sida,” ku iya nerang baru.

Ngelansa silik, Gerawat madah, Operasyen Benteng (Op Benteng betuaika Pasukan Gerakan Am (PGA), Polis DiRaja Malaysia (PDRM) enggau Raban Soldadu Malaysia (ATM) udah dipejalai dikena nagang penatai peranak menua luar enggau nadai pemendar.

Sekumbang Op Benteng berengkah dipejalai kena 22 Mei 2020 di Sarawak, bisi 95 Pati udah ditangkap enggau 415 iku Pati udah diburu pulai.

Nambahka nya, Opis Imigresyen mega bejalaika operasyen ngenyit ba taba projek ngaga kilang enggau ladang ngambi meresa sekalika pengereja menua luar nya sah tauka enda.

“232 operasyen udah dipejalai ba Sarawak bepun ari bulan Januari ngagai April. Nengah operasyen nya, 1,047 Pati mujur ditangkap enggau 17 iku pengaji udah didawa,” ku Gerawat nerang.


NERANG… Gerawat bejaku lebuh nyaut tanya Adun Balingian ba Aum Penggal Keterubah Dun Ke-19 Sarawak, ensanus.

Suara Sarawak