BEJADI…Hasidah bejadika kelai program Jom Berambeh di Samariang nyerumba ngintu Hari Pengajar 2022.

KUCHING: Pekara bekaul enggau pelajar entara kuasa otonomi ke patut diberi perati ngagai Sarawak nengah Sempekat Malaysia 1963 (MA63), ku Datuk Sharifah Hasidah Sayeed Aman Ghazali.

Sapit Menteri ba Opis Premier Sarawak (Undang-Undang, MA63 enggau Kaul Sarawak-Perintah Besai) nya madah, taja pelajar dibaru bidang kuasa perintah besai, tang perintah Sarawak mega mantaika penemu minta otonomi diberi kuasa lebih ari sikut bejalaika pengawa enggau sebarang aja pekara ba bidang pelajar.

Ku iya, entara pekara ke dipinta Perintah Sarawak mega iya nya minta Kerejasama Perintah Besai dalam nyapai juluk 90 peratus pengajar di Sarawak endang peranak menua tu empu.

“Kami mai semua tu ba randau ngambi perintah meri perati lebih otonomi ngagai nengeri tu dalam belajaika polisi pelajar menua.

“Amai aku enda nemu silik pasal isu pelajar ba nengeri tu, semina aku deka madah lebuh kami negika hak kitai nengah MA63, kami endang bisi berandauka pasal hak kitai ari sukut pelajar,” ku iya.

Iya amdah munyi nya maya bejadika Jom Berambeh di Samariang beserimbai enggau Hari Pengajar 2022, ditu, kemari.

Nya alai, ku iya sebarang aja pekara dikerandau , semua tu ngambi awak dikemujur.

Ba pengerami nya mega, Hasidah bisi ngagihka belanja RM10,000 ngagai Opis Pelajar Pelilih Kuching dikena ngatur program Jom Berambeh di Samariang nyerumba Hari Pengajar 2022.

Iya madah, raban sida udah meri belanja dikena mantu ngemujurka program nya.

Ku iya, raban sida endang nyukung pengawa baka nya dikena ngenang jasa bala pengajar ke udah bebendar ngajar anak bansa lebih agi ba Sarawak.

Nya alai, iya ngarapka program baka nya ulih ditampung dudi hari seraya ngasaika pengajar siti komposisi ke pemadu beguna.

Suara Sarawak