KUCHING: Perintah Sarawak naka ulih nyerungkai minyak bilun (SAF) dikena ngerumban agenda Kuasa Gadung di menua tu.

Premier Sarawak, Datuk Patinggi Tan Sri Abang Johari Tun Openg madah, pekara nya dikena ngasilka minyak bilun jet meruan agi ngambi ngurangka karbon ngelui 80 peratus taja pemansut SAF dikira dibanding minyak fosil.

“Minyak bilun alternatif baka SAF ulih nyadi pemun ngagai penerebai ke manah sereta ngemujurka strategi ngurangka karbon dalam industri enggau net-zero emissions goal,” ku iya nerang.

Abang Johari mansutka jaku nya ba licha iya ti berambaika jaku ‘Ngerumban Ekonomi Hidrogen Dunya: Chara Sarawak’ ba ‘World Hydrogen 2022 Summit and Exhibition’ di Rotterdam, Netherlands, kemari.

Nambahka nya ku iya, nengah ejensi pemansang enggau beranakka puku, Kaunsil Pemansang Ekonomi Sarawak (SEDC) bekerejasama enggau Palan Inovasyen Aeroangkasa Malaysia (AMIC) ba pemansang biofuel, hidrogen gadung enggau sel bahan api ungkup penerebai.

“Ari pemansang pemadu baru ba sel minyak hidrogen ungkup penerebai lebih agi pemansang baru dalam dron, aku melabaka enda lama agi sel minyakhidrogen ulih ngisi baru bilun engkabang bekuasa hidrogen.

“Nya kebuah, kami deka bekerejasama enggau industri penerebai nyengkaum industri marin dikena ngerumban inisiatif nyungkak pemansang SAF- biofuel, E-methanol enggau pengulih sel minyak hidrogen,” ku iya.

Berebak enggau nya, iya madahka tu mih maya kitai ngena pengulih besai hidrogen ke besai guna ungkup dudi hari ngambi nyendiaka kuasa ti beresi, likun enggau ulih dikena.

“Bekaul tanya dini kitai ulih nyeririska pengawa entara ngintu rampa menua enggau nyungkak ekonomi, ditu aku madah kebendar kitai nadai pilih, semina pengawa ke nyata diguna.

“Aku pechaya enti semua kitai bebendar ngerumban makit hidrogen enggau chara ti diseriris, tu ulih mantu nambahka pengawa beranakka puku ba perengkaguna begulai ke deka ngurangka belanja sereta ulih bekunsika penemu enggau chara pemadu manah,” ku Abang Johari.

Ngelansa silik, Abang Johari madahka dagang dunya ungkup komoditi ti dikunsi deka bulih pemaik ari sukut standard entarabansa ke deka meransang peminta komersial ungkup hidrogen.

“Nya alai, aku ngelaluka kerejasama ngambi bulih agi penemu ari menua enggau dunya pasal teknologi hidrogen enggau aplikasyen iya lebih agi tropika dikena ngerumban pemansang hidrogen beresi ke ulih dikena dunya,” ku iya nerang baru.

Ungkup rikod, ‘World Hydrogen 2022 Summit and Exhibition’ diatur pengelama tiga hari di Rotterdam, Netherlands bepun ari 9 ngagai 11 Mei tu.

Nya kebuah, Abang Johari ngulu eksibisyen begulai enggau urung 3,500 tuai perintah enggau industri ari serata dunya ngambi nyerungkai sereta nelebaka diri enggau teknologi hidrogen, aplikasyen enggau inisiatif pemadu baru ngambi sedia ngubah pemansang industri diatu.

Sama bisi enggau nyempulang Abang Johari iya nya Sapit Premier Sarawak Datuk Amar Douglas Uggah Embas, Sekretari Perintah Sarawak Datuk Amar Jaul Samion enggau Sapit Menteri Pengeluar Kuasa enggau Ngintu Rampa Menua Dr Hazland Abang Hipni.

Pia mega, Sekretari Pekara Wang Menua, Datuk Seri Dr Wan Lizozman Wan Omar, Direktor Unit Perambu Ekonomi Datuk Dr Muhammad Abdullah Zaidel, Chairman SEDC Tan Sri Datuk Amar Abdul Aziz Hussain, Chairman Sarawak Energy Berhad (SEB) Datuk Amar Hamed Sepawi enggau Tuai Pegawai Eksekutif SEB Datuk Sharbini Suhaili.

NYADIKA PENGINGAT… Abang Johari (tengah), Uggah (empat kanan) enggau deligit bukai begambar ungkup kenang lebuh ‘World Hydrogen 2022 Summit and Exhibition’ di Rotterdam, Netherlands, kemari.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak